Búgin nazarlaryńyzǵa jas aqyn Alpamys Faızollanyń bir top jańa óleńin usynyp otyrmyz. Alpamys – jańa zaman jyrshysy. Onyń boıyndaǵy baǵalap aıtatyn eń erekshe qasıet – Alpamystyń aǵylshyn tiline jetik saýaty. Álem ádebıetin túpnusqadan oqyp qana qoımaı, qazaq tiline kórkem tárjima jasap júrgen jas aqynnyń talabyna sáttilik tileımiz.
Alpamys FAIZOLLA – 1995 jyly 6 naýryzda Oral qalasynda dúnıege kelgen. 2016 jyly ál-Farabı atyndaǵy QazUÝ-dyń jýrnalıstıka fakýltetin, 2018 jyly L.N.Gýmılev atyndaǵy EUÝ-dyń fılologııa fakýltetiniń magıstratýrasyn támamdaǵan. О́leńderi «Aq jelkenniń ulandary», «Jaýqazyn jylda gúldeıdi», «О́lmes óleń» t.b. jastar jınaqtaryna engen. Kóptegen respýblıkalyq baıqaýlarda júldeger bolǵan.
***
Taýlar nege alyppyn dep aıtpaıdy?
Juldyz nege jaryqpyn dep aıtpaıdy?
Emen nege berik dińim demeıdi?
Gúlder nege kóriktimin demeıdi?
Bıiktigin buldamaıdy kók nege?
Qyzýymen maqtanbaıdy ot nege?
Esten shyqpaı Jaratqannyń jarlyǵy,
Qul ekenin sezine me barlyǵy?
***
Qateliksiz adam syndy kúnəsiz,
Izgi amal jasar kezde buǵasyz.
Jer ǵumyryn aıaqtaýǵa túbinde,
Bir topannyń keletini shúbəsiz.
Bireý soǵan alyp keme jasaýda,
Bireý shaǵyn qaıyqqa aǵash qashaýda.
Al bireýde esh daıyndyq joq biraq,
Topan kelse, jer tabar ma qasharǵa?!
GAÝHARTAS
Ǵashyqtyq bitpes dastan ǵoı,
Jyrlaıdy aqyn nar tekti.
Júregim meniń – aspan ǵoı,
Aspanym kenet jarq etti.
Keýdemde óleń órilip,
Janardy arbap jaýhar tas.
Alataý jaqtan kórinip,
Sáýlesin shashqan Gaýhartas.
Júrek-aspanym jarq etti,
Sáýleńnen seniń, Gaýhartas.
Amalym quryp, hál ketti,
Áýreńnen seniń, Gaýhartas.
Qulaq sal mendik tilekke,
О́leń bop laýlap janaıyn.
Gaýhartas, seni júrekke,
Táj qylyp taǵyp alaıyn.
О́zine meni shaqyrdy,
Alaýdan ystyq asyǵym.
Qınama endi aqyndy,
Saryla kútken, asylym...
FÝTBOL ALAŃY
Týǵan jerdiń saı-salasy, alaby,
О́tken shaqty jıi esime salady.
Bizdiń úıdiń art jaǵynda, Oralda,
Bola-tuǵyn úlken fýtbol alańy.
Qansha aıdy, qansha jyldy zyrlatyp,
Balalyqty aldyq sonda urlatyp.
Dop tebýden sharshamaıtyn edik biz,
Ketse-daǵy qas qaraıyp, kún batyp.
Sol alańǵa men jyl saıyn kelemin,
Saǵynysh pen qııalǵa erik beremin.
Bir sary bala júredi ylǵı dop oınap,
Biraq ony tek men ǵana kóremin.
Jetelese, jalyny men oty alǵa,
Altyn kezdik qap túbinde jatar ma?
Bir kezderi oıyn qýǵan sol bala,
Oı qýyp júr qazir basqa shaharda.
Balǵyn shaqtyń árbir sáti, kúni – baq,
Eske alsam, jan-júregim jylymaq.
Baǵyttalǵan dop sekildi qaqpaǵa,
Balalyǵym ótip ketti zymyrap...
***
Bala kezde kórgen emen qaıǵy oılap,
Eske alamyn júzim bal-bul jaınaı qap.
Júgirýshi ek kóktegi ushaq sońynan,
«Bizdi ózińmen ala ket!» dep aıǵaılap.
Balalyǵym qansha qyr men bel kezdi,
Ańshy qýǵan ańdaı menen ol bezdi...
Erjetken soń talaı ushtym ushaqpen,
Biraq áli saǵynamyn sol kezdi.
Kýá qylyp jer men jeti qat kókti,
Kelmeske endi sol ǵajaıyp shaq ketti.
Al ushaqtar ózimenen bizdi emes,
Bizdiń qaıran balalyqty ap ketti...
JATAQHANA
Bolashaqtan - beıtanys, urpaǵymyz,
Bosat dep tur ornymdy,
Estidiń be?!
Muqaǵalı Maqataev
San muńaıtqan, qýantqan hám kúldirgen,
О́zińe jat bolarymdy kim bilgen?!
Jataqhanam, tórt jyl turǵan turaǵym,
Saǵan kelip bótensirep turmyn men.
Janym ańsap osynda ótken kúnimdi,
Toımaı ishtim saǵynyshtaı shyryndy.
О́ziń tursyń, qaıda biraq qatarym?
Maǵan tanys júzder qaıda burynǵy?
Bizdiń jastyq qanatyn keń jaıǵanda,
Júrýshi edik toımaı saýyq-saıranǵa.
Búgin basqa býyn kepti, kúı keshtim –
Shyǵyp qalǵan balyqtaıyn qaırańǵa.
Qas qaǵymda quıyp óter jaýyndaı,
Ýaqyt júırik óte shyǵar daýyldaı.
Qatarym joq,
Jataqhanam kórindiń –
О́zi kóship, jurty qalǵan aýyldaı.
...Sezingende aýyrlyǵyn júgimniń,
Aqylymnyń aıtqanyna jyǵyldym.
Jataqhanam, saǵan kelip búgin men,
Ýaqyttyń tym baıansyzyn uǵyndym.