Lenınskoe aýylynyń turǵyndary tórt jyl boıy jabaıy arpamen alysyp álek. Bıyl taǵy da úlken ábigerge túsirdi. Jyl ótken saıyn aýqymy úlkeıip, qyrdy aıtpaǵanda tutas eldi mekenge jaıylyp úlgergen. Túp-tamyrymen qyrqyp, joıyp tastaýǵa jeke adamdar túgili sharýa qojalyqtary da qaýqarsyz.
Jurt aýzynda jabaıy, jaldy, kanadalyq dep atalyp ketken arpa syrt kózge ádemi, zııansyz kóringenimen, aýylsharýashylyq daqyldary men tórt túlik maldyń qas jaýy kórinedi. О́simtaldyǵy sonshalyq, tez taralyp, atshaptyrym aýmaqqa tamyr salyp úlgeripti. Zeınetker Arǵyn Úseıinovtiń ıyqqa trımmerdi ilip alyp, aýlasyn tazalaǵanyna birneshe kún bolypty. Biraq jaýynnan keıingi sańyraýqulaq qusap qaıtadan qaptap ketedi eken. Alystan qarasa, aýyl dáni pisip, masaǵy tolysqan sap-sary eltinjaldyń ortasynda turǵandaı áser beredi. Bul – shyn máninde qaýlaı ósken aramshóp.
«Byltyr myna jerdi tap-taza etip oryp tastaǵanbyz. Shapqan saıyn balalaı bere me deımin. Tipti kóbeıip ketti. Joldardy, jaıylymdardy basyp, egistik alqaptarǵa jaqyndap qaldy. Dereý aldyn alý sharalary shuǵyl júrgizilmese, jaǵdaıdyń kúrdelenip ketetin túri bar», deıdi lenındikter.
Osy sebepti baqtashylar mal jaıylymyn aýystyryp, basqa jaqqa baǵýǵa májbúr. Jýyrda jabaıy arpany jegen bir qoı aıaqasty sereıip, soısa, ishek-qarnyna shóptiń tikenekteri qadalyp qalypty. Bir aýyldy ábden mezi qylǵan jabaıy arpa bala-shaǵa nápaqasyn aıyryp otyrǵan mal ıelerin de jaısyzdyqqa uryndyrýy múmkin. О́ńirdiń fıtosanıtarlary aramshóptiń tórt túlik malǵa da, egistikke de asa qaýipti ekenin jasyrmaıdy. Odan qutylýdyń bir ǵana joly – hımııalyq óńdeý. Alaıda jappaı áser etetin sheteldik gerbısıd óte qymbat turady. Onyń ústine oǵan memleket tarapynan qarajat bólý jaǵy qarastyrylmaǵan.
Jergilikti bılikten de kúderlerin úzgen Lenınskoe aýylynyń turǵyndary trımmer men qol shalǵy satyp alýǵa jappaı kirisip ketken syńaıly. О́ıtkeni óz kúshterine senýden basqa amal joq. Soltústik Qazaqstan oblysy,Aqqaıyń aýdany