Búgin Qytaıdaǵy eń baı adam Djek Ma Alibaba Group Dırektorlar keńesiniń tóraǵasy qyzmetinen ketedi.
Qytaılyq BAQ-tyń jazýyna qaraǵanda, kásipker bul sheshimin bir jyl buryn jarııalaǵan.
Dırektorlar keńesiniń tóraǵasy laýazymy qazirgi bas dırektor Danıel Chjanǵa tapsyrylady. Qyzmetinen ketken soń Djek Ma Alibaba Group-tiń Dırektorlar keńesiniń múshesi retinde kompanııanyń 2020 jylǵy jalpy jınalysyna deıin jumysyn jalǵastyrady.
Osydan keıin ol «Alibaba turaqty seriktesi» qyzmetinde bolady. Jospar boıynsha búgin keshke Hanchjoýda Alibaba-nyń qurylýyna 20 jyl tolýyna oraı ótetin rásimde Dırektorlar keńesiniń tóraǵasy Djek Ma qyzmetin Danıel Chjanǵa resmı túrde tapsyrady dep kútilýde.
Desek te qazirgi ýaqytta Alibaba Group Djek Manyń otstavkaǵa ketetini týraly resmı aqparat jarııalaǵan joq.
Eske sala ketsek, Djek Ma nemese Ma Iýn - qytaı kásipkeri jáne fılantrop. Ol Alibaba Group tabysty ınternet bıznes tobynyń negizin qalaýshy jáne atqarýshy tóraǵasy, Forbes muqabasyna jarııalanǵan alǵashqy qytaılyq kásipker.