Elimizde elektrondy kommersııany damytýdyń 2019-2025 jyldarǵa arnalǵan jol kartasy bekitildi. Júıeli jumys júrgizilse, aldaǵy alty jylda elektrondy saýdanyń úlesi qazirgi 2,9%-dan 5%-ǵa deıin artýy bek múmkin.
Bul týraly Úkimette ótken baspasóz konferensııasynda Saýda jáne ıntegrasııa mınıstri Baqyt Sultanov málimdedi. Onyń aıtýynsha, elektrondy saýdany damytý úshin bizde barlyq zańnamalyq jaǵdaılar jasalǵan. Zamanaýı saýda formattaryna da kóp kóńil bólinýde.
− 2019 jylǵy 2 sáýirde «Bıznes ortany damytý jáne saýda qyzmetin retteý týraly» zań qabyldandy, onda elektrondy saýdany jáne bırja saýdasyn damytý kózdelgen. Tıisti ınfraqurylym jasalýda. Qazir naryqta 20-ǵa jýyq platforma bar, shamamen 1700 kásipker elektrondy kommersııada jumys isteıdi, dedi B.Sultanov.
Qazaqstan jetekshi álemdik korporasııalardyń kómegimen ınternet arqyly saýdany damytýdy kózdeıdi. 2019 jylǵy 26 tamyzda Saýda jáne ıntegrasııa mınıstrligi men Reseıdegi №1 «Wildberries» onlaın-rıteıler arasynda О́zara yntymaqtastyq týraly kelisimge qol qoıyldy. Onda «Wildberries» qatysatyn barlyq aýmaqta elektrondy saýda arnalaryn qoldanyp, qazaqstandyq eksporttaýshylardyń halyqaralyq saýdaǵa qatysýy qarastyrylǵan. Qazaqstandyq taýarlardy eksporttaýdy ilgeriletý úshin basqa da sheteldik ınternet-alańdarmen osyndaı jumystar júrgizý josparlanyp otyr.
– Biz olarmen birge elektrondy saýdany damytý júıesin ázirlep, úlesin arttyratyn bolamyz. Búginde ınternet saýdanyń bólshek saýdaǵa qatysty úlesi − 2,9%. Memleket basshysynyń Qytaıǵa sapary aıasynda Alibaba tárizdi iri elektrondy alań ókilimen kezdesý josparlanǵan. Bul salada salmaqty oıynshylardyń bolýy bizge barynsha durys baǵytta damýǵa múmkindik beredi. Bizdiń kásipkerlerimiz álemdik oıynshylarmen belsene yntymaqtastyq ornatýǵa tıis. Bul Qazaqstanda elektrondy kommersııany qarqyndy damytýǵa múmkindik beredi, dedi mınıstr. Aldaǵy ýaqytta túsindirý jumystaryn júrgizýge basymdyq berilmek.