Keı-keıde sharýanyń yńǵaıyna oraı áldebir mekemeniń jumysy týraly aqparat qajet bolsa, saıtyn ashyp qaraıtynymyz bar. Sondaı shaqta memlekettik mekemelerdiń saıtynda memlekettik tilge degen nemquraılylyqtyń ıisi ańqyp turady-aý, ańqyp turady.
Búgingi tańda áleýmettik máseleler kópshilikti qatty tolǵandyrýda. El Prezıdenti Qasym-Jomart Toqaevtyń halyqqa arnaǵan Joldaýynan keıin qandaı jańalyq bar eken, áleýmettik jaǵynan az qamtylǵan otbasylarǵa jeńildikter bar ma, kimderdiń nesıesi keshiriledi degen sandaǵan saýaldyń týýy zańdy. Sondyqtan da kóptegen adamdardyń oblystyq jumyspen qamtý jáne áleýmettik baǵdarlamalardy úılestirý basqarmasynyń saıtyna topyrlap kirip jatatyny bar. Taıaýda biz de kirdik. Biz túsinbeıtin jaı birden bastaldy. «Qurmetti kirip-shyǵýshylar!» dep jazylǵan eken. Kirgenimiz sol edi myna jazýdy oqyǵan soń tezirek shyǵyp ketkimiz kelgeni. Ájem jaryqtyq, «kórshi úıdiń hal-jaǵdaıyn bilip kirip-shyǵýym kerek edi» dep otyratyn. Sóıtsek, bul «Dorogıe posetıtelı!» degenniń aýdarmasy eken ǵoı. Bir ǵajaby bul jazba basqarma basshysy Dına Ahmetjanovanyń atynan berilgen basty bette taıǵa tańba basqandaı etip jazylyp tur.
Bul saıttyń amandyǵyn bilgen soń basqa qyrýar mekemelerdiń saıtyna «kirip-shyqtyq». Kópshiliginde «qazaq tili» degen sóz «kaz» dep qysqartylyp alynǵan. Endi qaıtsin tórtkúl dúnıe tegis únemdeýge kóshkende, «qazaq» degen bes áripten turatyn sózdiń eki árpin jazbaı yqshamdaǵan túrleri. Biraq «q»-ny «k» dep jazǵan. О́zgeni aıtasyz, dál osyndaı qatelik oblystyq bilim basqarmasynyń saıtynda da kekeshtene sóılep tur. Al «kirip-shyǵý» týraly kesimdi pikir aıtsaq, anyǵynda bul «saıtty paıdalanýshylar» bolsa kerek.
Memlekettik tilde eshbir derek-dáıegi joq saıttardan kóz súrinedi. Bizdiń óńirde qazaq tiliniń kirpigi ǵana qımyldap jatyr. Saıttaǵy soraqylyq mynaý! Al jınalys ataýly áýeli qazaq tilinde bastalyp, bir-eki aýyz sóz aıtqan soń jergilikti jurtqa osy da jaraıdy degendeı, ordańdaǵan orysshaǵa kóshedi. Buǵan etimiz ábden úırengen. Qazir taza qazaqsha sóıleıtin adam kórsek, jatyrqap turatyn jaǵdaıǵa jettik. Oblystyq dene shynyqtyrý jáne sport basqarmasynyń saıtyn ashyp jiberseńiz, «Qurmetti hanymdar men myrzalar!» dep bastalady. Janyńa jyly tıetin osy sózdi oqyǵanda aınalyp keteıinder-aı dep jylap jibergiń keledi. Biraq ári qaraı saýatsyzdyqtyń samsap turǵanyn kórgende, jigeriń qum bolyp, sileń qatady. Oqı almaısyń. Oqyǵanmen, túsine almaısyń.
Qalaı bolǵan kúnde de ılegenimiz bir teriniń pushpaǵy – el ıgiligi jolyndaǵy eńbek bolǵan soń memlekettik tilge degen qurmet esten shyqpaýy kerek. О́ıtkeni ol ulttyń tuǵyry men rýhy emes pe?!