21 qyrkúıek kúni elordada Dúnıejúzilik tazalyq jáne Aǵash otyrǵyzý kúnine oraı jalpyqalalyq senbilik ótedi. Bul týraly Nur-Sultan qalasy ákimdiginiń resmı saıty habarlady.
Senbilikke kásiporyndar, uıymdar men joǵary oqý oryndary, ortakásiptik oqý mekemeleri, mektepke deıingi men jalpy bilim beretin mekemeler, densaýlyq saqtaý jáne memlekettik mekemeler, ulttyq kompanııalar qatysady dep josparlanǵan.
Senbilikke shyǵatyndarǵa qoqysty jınaýǵa arnalǵan (kúrek, tyrnaýysh) jabdyqtar, qolǵap pen qaptar beriledi. Sondaı-aq sol kúni elordamyz «Dúnıejúzilik tazalyq kúni» halyqaralyq ekologııalyq aksııasyna qosylady, oǵan álemniń 150-den astam elinen 380 mln erikti qatysady.
Jınalǵan barlyq qaldyqtar suryptalyp, odan ári qaldyqtardy óńdeý zaýytyna tasymaldanady. Jalpyqalalyq senbiliktiń basty maqsaty - qoǵam nazaryn ekologııalyq máselelerge aýdaryp, aınalany taza ustaýǵa, ekologııalyq mádenıetti qalyptastyrýǵa úles qosý. Kóshelerdi jáne aýlalardy abattandyryp, qalany tazalaý jumysyna elordamyzdyń kez-kelgen turǵyny qosyla alady.