«Kókshetaý» mádenıet saraıynda «Qazaqstan. A la Prima» forýmdary sheńberindegi «Býrabaı ańyzdary» atty sýretshilerdiń halyqaralyq forýmynyń qortyndy kórmesi ótti.
Forýmdy Aqmola oblysynyń ákimdigi men oblystyń mádenıet, Arhıvter men qujattamalar basqarmasy, oblystyq halyq shyǵarmashylyq jáne mádenı demalys ortalyǵy, «Qazaqstan. A la prima» seriktestigi birlesip ótkizdi.
Jıyrma kásibı sýretshi qatysqan jobaǵa 10 elden qylqalam sheberleri keldi. Forýmnyń maqsaty – elimizdiń kórikti, tarıhı qundylyqtarǵa baı jerlerin nasıhattap, shyǵarmashylyq baılanysty nyǵaıtý jáne tájirıbe almasyp, elimizdiń týrıstik áleýetin kórsetý. Shara on tórt kúnge sozyldy.
– «Rýhanı jańǵyrý» baǵdarlamasynda aıryqsha mán berilgenindeı, árbir qazaqstandyqtyń kórkemdik, shyǵarmashylyq áleýetin damytýǵa nazar aýdarylǵan. Forým aıtýly mádenı oqıǵaǵa aınaldy, – dedi oblys ákiminiń orynbasary Aına Mysyrálimova.
Qylqalam sheberleri Býrabaıdyń kórkem tabıǵatyn beınelep qana qoımaı, el tarıhyn, ólke tynysyn, ótkenniń óńdi elesin beıneleý óneri arqyly jetkizipti. Áli boıaýy keppegen týyndylar tarıh pen búgingi kún tynysynan syr shertip tur.
Forým aıasynda shyǵarmashylyq kezdesýler, baspasóz konferensııasy, sheberlik synyptary jáne dóńgelek ústel ótkizildi. Ashyq aspan astynda júrgizilgen jumystardyń qortyndylary elorda mýzeılerinde jalǵaspaq.