Kenshiler astanasynda 19-20 qyrkúıek kúnderi aqyn-jazýshy, memleket jáne qoǵam qaıratkeri Sáken Seıfýllınniń 125 jyldyǵyna arnalǵan jas aqyndar men jazýshylardyń respýblıkalyq forýmy ótedi.
Jıynǵa Israıl Saparbaı, Júrsin Erman, Nesipbek Aıtuly, Ǵalym Jaılybaı, Qalqaman Sarın jáne qazaq ádebıetiniń basqa da belgili tulǵalary qatysady. Forým barysynda aqyn-jazýshylar qazirgi qazaq ádebıetiniń jetistikteri men mádenı dástúrlerin jáne jańa trendterin talqylaıdy. Eki kúndik baǵdarlama aıasynda pikirtalastar, tusaýkeserler jáne sheberlik synyptary uıymdastyrylady.
Búgingi tańda mádenıet pen mádenı áleýetti damytý álem memleketteri men kóptegen halyqtardyń ósip-órkendeý jolyndaǵy negizgi basymdyqtary qataryna jatatynyn atap ótti uıymdastyrýshylar.
«Abaıdyń danalyǵy, Áýezovtiń qalamy, Sákenniń syrly óleń joldary, Qurmanǵazynyń sıqyrly sazy – bul bizdiń rýhanı mádenıetimizdiń bir bóligi ǵana. Bizdiń ulttyq salt-dástúrimiz, tilimiz ben áýenimiz, ádebıetimiz, bir sózben aıtqanda, ulttyq rýhymyz bizben máńgi birge qalýy tıis. «Rýhanı jańǵyrý» baǵdarlamasynyń kózdegeni de osy», deıdi olar.
Forýmda Sáken Seıfýllınniń 125 jyldyǵy men «Egemen Qazaqstan» gazetiniń 100 jyldyq mereıtoıyna baılanysty basylym basshysy Darhan Qydyráli baıandama jasaıdy dep josparlanǵan. Eske salsaq, Sáken Seıfýllın 1922 jyly «Eńbekshi qazaq» (qazirgi «Egemen Qazaqstan») gazetiniń bas redaktory bolǵan.
Baǵdarlamaǵa saı, forým qonaqtary úshin túrli sharalar qarastyrylǵan. Mysaly olar Dolınka kentindegi saıası qýǵyn-súrgin qurbandaryn eske alý murajaıyna ekskýrsııa jasaıdy. Sonymen qatar basqa da mazmundy is-sharalary josparlanǵan.
Qaraǵandy oblysy