Keshe Úkimettiń baspasóz ortalyǵynda ótken brıfıng barysynda Energetıka vıse-mınıstri Suńǵat Esimhanov qysqy jylytý maýsymyna daıyndyq barysy týraly aıtyp berdi.
S.Esimhanov Qazaqstannyń biryńǵaı elektr energetıkalyq júıesi shtattyq rejimde jumys istep turǵanyn jetkizdi. Onyń baıandaýynsha, osy jyldyń 19 qyrkúıegindegi málimetterge sáıkes respýblıka boıynsha elektr energııasyn tutyný 72,5 mlrd kVt qurady. Bul – ótken jyldyń osy merzimindegi deńgeıden 1,7%-ǵa artyq.
Sonymen qatar vıse-mınıstr energııa óndirýshi jáne berýshi kásiporyndardy kúzgi-qysqy kezeńge daıyndaý bekitilgen jóndeý kestelerine sáıkes júrgizilip jatqanyn atap ótti.
Búginge deıin elimizde 5 energoblok, 40 qazandyq, 23 týrbınada jóndeý jumystary júrgizilgen, 4 energııa blogynda, 28 qazandyqta jáne 18 týrbınada bul jumystar jalǵasý ústinde. Iаǵnı jylý beretin iri kásiporyndardaǵy jóndeý jumystary bel ortasynan aýyp otyr.
Munyń syrtynda aldaǵy jylytý maýsymyna daıyndyq úshin ortalyqtandyrylǵan jylýmen qamtý aımaǵyndaǵy 459 qazandyqtyń 428 qazandyǵyna jóndeý jumystary júrgizildi. Sóıtip bul jónindegi jyldyq jospardyń 93%-y oryndaldy.
«Sondaı-aq 21 myń shaqyrym elektr jetkizý jelileri men 1152 shaǵyn stansaǵa jóndeý jumystary júrgizildi, bul jyldyq jospardyń tıisinshe 84% jáne 92%-yn quraıdy» dedi S.Esimhanov.
Sonymen qatar ol birqatar óńirde jóndeý jumystary kestede belgilengen merzimnen keshiktirilip jatqanyn atap ótti.
«Máselen, Pavlodar oblysynda ornalasqan «Eýraazııalyq energetıkalyq korporasııa» AQ elektr stansasy. Bul eń iri memlekettik aýdandyq elektr stansasy (MAES). Onyń jumysyna jergilikti ákimdik jáne aksıonerlermen qatar, bizdiń mınıstrlik komıteti de baqylaý jasaıdy. Búginde eki blok – №5 jáne №8 boıynsha jóndeý merzimi kesteden qalyp keledi. Jóndeý jumystary maýsym men tamyz aılarynda aıaqtalýy tıis bolsa, endi tek qazan aıynyń sońynda aıaqtalmaq. Biraq bul MAES-tiń jylý berýge qatysy joq. Bul tek energııa júıesine áser etýi múmkin bolǵan soń atap ótip otyrmyn» dedi vıse-mınıstr.
Sonymen qatar S.Esimhanov stansalardaǵy otyn daıyndaý jumystary týraly da habardar etti.
«Bizde kómirmen jylytylatyn 20 iri energetıkalyq kásiporyn bar. Qazirgi tańda osy stansalarda 4 mln tonna kómir qory bar. Bıyl kásiporyndar aıtarlyqtaı jaqsy jumys atqardy. О́tken jylmen salystyrǵanda 600 myń tonna kómir artyq daıyndaldy» dedi vıse-mınıstr.
Sonymen, búginde barlyq stansalarda kómir qory bar. Máselen, О́skemen jylý energııa ortalyǵynda qalyptastyrylǵan kómir qorynyń kólemi 20 táýlikke jetýi tıis edi, qazir mundaǵy kómir qory 38 táýlikke jetedi. Al kómirdi az tutynatyn Balqash jylý energııa ortalyǵynda onyń 2-3 aıǵa jetetin qory qalyptasty.
Osy jyldyń 19 qyrkúıegindegi jaǵdaı boıynsha energııa kózderiniń qoımalarynda mazýt qory 101,9 myń tonnany quraıdy. Bul – ótken jylǵy kórsetkishpen salystyrǵanda 24%-ǵa kóp.
S.Esimhanovtyń aıtýynsha, Energetıka mınıstrligi qosylǵan qun salyǵyn qosa eseptegende 100 myń teńge baǵamen 277 myń tonna kóleminde «áleýmettik» mazýt jetkizý kestesin bekitti.
«Jalpy alǵanda, aldaǵy jylý berý maýsymyna daıyndyq turaqty rejimde júrip jatyr» dedi bul jóninde Energetıka vıse-mınıstri.
Sonymen qatar jylý jelileriniń temperatýralyq kesteleri Energetıka mınıstrligi men Energetıkalyq qadaǵalaý komıtetiniń saıttarynda jarııalanǵanyn atap ótti. Atalǵan kesteler saqtalmaǵan jaǵdaıda, eń aldymen, temperatýralyq jaǵdaıdy qamtamasyz etetin jylý berýshi uıymdarmen baılanys ornatý qajet. Jergilikti ákimdikpen birge qajetti oryndarǵa baryp, sebepterin anyqtaıtyn komıssııalar qurylady.
«Mundaı júginýler Energetıkalyq qadaǵalaý komıtetine de kelip jatady. Ondaı kezde bizdiń aýmaqtyq departamentterimiz máseleni dereý anyqtaýǵa barady. Sondyqtan da aýmaqtyq energetıkalyq qadaǵalaý departamentterine qosymsha habarlasýǵa bolady. Barlyq málimetter men koordınattar saıtta jarııalanǵan» dedi vıse-mınıstr.