QURMETTI QAZAQSTANDYQTAR!
Tarıhı tamyry tereńge boılaǵan áz-Naýryz dana halqymyzda qaı kezde de eńsesi bıik eldiktiń, irgesi sógilmes birliktiń, yrys pen yntymaqtyń merekesi bolyp kelgen.
Qazaqstan halqy úshin Naýryz meıramy – kóktem men jańarýdy aıshyqtaıtyn mereıi tasyǵan uly mereke. Naýryz – kóktemgi jańarýdyń, mahabbattyń, aq peıil men tatýlyqtyń merekesi. Ol – ótkendi saralap, bolashaǵymyzdy boljaıtyn erekshe kezeń.
Bıylǵy jyldan bastap Naýryz merekesi BUU Bas Assambleıasy tarapynan halyqaralyq meıram dep moıyndalyp, búkil adamzat balasynyń mádenı murasy retinde baǵalandy. Al Qazaqstanda turatyn barlyq ult pen ulystyń tatýlyq pen kelisimde turmys keshýi, qoǵamdaǵy barsha azamattyń etnostyq, tildik jáne konfessııalyq ereksheligine qaramastan, teń quqyqqa ıe bolýy ejelden kele jatqan Naýryz merekesiniń qaǵıdattarymen sáıkes keledi.
Elimiz álemdik qarjy daǵdarysy saldarynan arylyp, damý jáne órkendeý bıikterine senimdi kóz tigip otyr. Elbasy Nursultan Nazarbaev óziniń bıylǵy Qazaqstan halqyna Joldaýynda elimizdiń órkendeýi, ındýstrııalyq baǵdarlama, kommýnaldyq turǵyn úı salý máselelerin tıimdi sheshý joldaryn qarastyryp, Úkimetke qyzmetkerler men zeınetkerlerdiń tabystary men jalaqylaryn ósirý týraly naqty tapsyrma berdi. Osynyń barlyǵy ártúrli ult pen ulystyń ókili bolyp tabylatyn el turǵyndarynyń birlikte, yntymaqta ómir súrýine kepil, bolashaqqa degen senim bolyp tabylady.
Búgin biz qol jetken tabystarmen toqtap qalmaı, órkenıetti elder qataryna kirý maqsatynda aıanbaı eńbek etýimiz qajet. Birligimiz bolsa, tirligimiz bolsa, biz áli talaı belester men bıikterdi baǵyndyryp, álemde Qazaqstan týyn asqaqtata beremiz.
Qymbatty otandastar!
Aq nıetpen ótkenge salaýat aıtyp, aq tilekpen jańa Naýryzdy qarsy alaıyq! Otanymyzǵa – bereke, halqymyzǵa – ıgilik, memleketimizge – molshylyq, al ár shańyraqqa baqyt pen shattyq tileımiz.
Elimiz órken jaıyp, Naýryz barshamyzǵa yntymaq pen sáttilik alyp kelsin!
Qazaqstan halqy Assambleıasy.