Qos aqyn úzeńgi qaǵystyrdy

Qym-qıǵash tartysqa toly bolǵan aıtystyń alǵashqy kúni jeti saǵatqa sozyldy. Toǵyz jup ózara óner synasyp, úzdik shyqqan jeti aqyn fınaldyq saıysqa joldama aldy. Al ekinshi kúni aqyndar alty saǵat aıtys jasap, tyń­darman qaýymnyń jan saraıyn semirtip, qulaq quryshyn qandyrdy. Osyn­sha ýaqytqa sozylsa da Sáken atyn­daǵy teatrdyń saraıyndaǵy birde-bir kó­rermen ornynan turyp ketpedi. Iаǵnı, bul degenińiz aqyndar jurttyń kóńilinen shyqqan jaqsy aıtystyń otyn jandyra bildi degen sóz.

Jurttyń janyna jaqqan aıtys­tyń birin Jandarbek Bulǵaqov pen Baýyr­jan Shermedınuly jasady. Degen­men aldyńǵysynyń sóz saptasy, qıyn­nan qıystyrǵan tapqyr sheberligi qarsylasynan áldeqaıda ozyq turdy. Mysaly, Jandarbektiń «Qazaqstan kóp ultqa ortaq Otan bolsa, qazaq tili de ortaq til bolý kerek» degen maǵynadaǵy ushqyr oıyna kórermen qaýym bek rıza bolyp, uzaq qol soqty.

Maqsat Ahanov pen Nurmat Mansurov arasyndaǵy sóz saıysynda da súısinerlik tustar asa kóp boldy. Eki aqyn usaqtalmaı, kesteli tilmen kesek-kesek oılar aıtyp, aýqymdy máselelerdi de qozǵaýǵa bara aldy. Sonysymen de tyńdarman men qazylar kóńilinen shyqty degen oıdamyz. Ásirese Nurmat shaıyr Sáken taqy­rybyna tereńdeı enip, jalyndy aqyn, kórnekti memleket qaıratkeriniń kósheli isterin jadymyzda qaıta jańǵyrtyp, suńǵylalyq tanytqany súısintti. Mysalǵa alsaq, ol Sáken aqynnyń qolynda bılik turǵan kezinde arnaıy buıryq shyǵaryp, Aleksandr Zataevıchke qazaqtyń 1000 ánin jınatqanyn, basqa da ult múddesi úshin istegen ıgi isterin sheber tilmen el esine sala bildi.

Sonymen qatar, Aıbek Qalıev pen Dıdar Qamıev, qyrǵyzstandyq Jeńishbek Toqtobekov pen Qytaı qazaǵy Búrkitqazy Ádilbek jáne Tólegen Jamanov pen Ásem Erejeqyzy juptarynyń arasyndaǵy jyr saıysy aıtystyń kórigin qyzdyra tústi.

Jalpy, bul aıtystyń Qaraǵandy obly­synyń ákimdigi men Nur Otan par­tııa­synyń qoldaýymen uıymdas­tyrylǵanyn aıta ketken jón. Aıtystyń ekinshi kúni kenshiler astanasyna arnaıy kelgen Nur Otan partııasy tóraǵasynyń birinshi orynbasary Baýyrjan Baıbek jyr dodasyn ótkizý úshin Qaraǵandynyń kezdeısoq tańdalmaǵanyn atap ótti.

– Sebebi, – dedi ol, – Saryarqanyń kıeli topyraǵynda Sáken Seıfýllın dúnıege kelgen. Mundaǵy ónerdiń bul túrine degen úlken qoldaý adamdy súısintedi. Aıtys – halyqtyń janyna jaqyn óner. Biz aqyndardyń jyrlary arqyly adamdardyń ótinish-tilegin estigimiz keledi. Mádenı jáne rýhanı jańǵyrý, dástúrdi saqtaý bizdiń saıası doktrınamyzdyń bir bóligi.

Halyq ártisi, Qazaqstannyń Eńbek Eri Asanáli Áshimov basqarǵan qazylar alqasynyń sheshimimen eki bas júlde taǵaıyn­dalyp, olarǵa Maqsat Ahanov pen Jandarbek Bulǵaqov laıyqty dep tanyldy. Nur Otan partııasy tóraǵasynyń birinshi orynbasary Baýyrjan Baıbek eki aqynnyń árqaısyna eki mıllıon teńgeniń sertıfıkatyn tabys etti.

Birinshi oryn men 1 mıllıon teńgeniń júldesi О́mirjan Kópbosynov pen Baýyr­jan Shermedınulyna buıyrdy.Dıdar Qamıev, Muhtar Nııazov jáne Tólegen Jamanov 500 myń teńgeden alyp, ekinshi oryn júldegerleri atandy. Al úshinshi júlde – 300 myń teńgeniń sertıfıkattaryn Aıbek Qalıev, Búrkitqazy Ádilbek, Ásem Erejekqyzy, Bekarys Shoıbekov jáne Nurmat Mansur ózara bólisti.

Sondaı-aq «Sáken Seıfýllın qory­nyń» arnaıy syılyǵy qyrǵyzstandyq Jeńishbek Toqtobekovke tapsyrylsa, aıtystyń eń jas qatysýshysy Juldyzaı Maratbekova «Asanáli Áshimov qorynyń» arnaıy syılyǵyna ıe boldy.

Halyqaralyq aıtystyń júrgizýshisi Júrsin Erman aqyndardyń óte ózekti máse­lelerdi kótere alǵanyn jáne Sáken­deı suńqar aqynnyń, kórnekti memleket qaıratkeriniń bolmys-beınesin asha alǵanyn rızashylyqpen atap ótti.

– Menińshe aqyndardyń árqaısynyń jeńýge múmkindigi boldy. Aıtystyń alǵashqy kúni aqyndar búgingi kúnde halyq­ty tolǵandyryp júrgen kóptegen máse­leni sahna tórinen kótere bildi. Al munyń sheshimin tabýdyń Nur Otan partııasy doktrınasymen úndesip jatqany bizdi qýantady. Osynyń bárin kórermen qaýym da qyzý qoldap otyrdy, – dedi aıtys óneriniń qamqorshysy. QARAǴANDY