Almaty qalasy ákimdiginiń baspasóz ortalyǵynda ótken brıfıngte Almaty qalasyn damytý ortalyǵynyń ókilderi qalalyq ákimdiktiń qoldaýymen Almaty SmartCity Challenge hakatony qalalyq jarysty bastaıtyndyǵyn málimdedi.
5-6 qazanda ótetin Q-Lab qalalyq jobalar zerthanasynda (Abaı dańǵ.,90) baǵdarlamalyq ónimderdi otandyq ázirleýshiler jańa sıfrlyq servıster men ónimderdi ázirleý jáne tanystyrý maqsatynda komanda jasaqtalady.
Ideıadan prototıpke deıingi ýaqyt bir táýlikti quraıdy. Júlde qory 3 mln teńge kóleminde. Qatysýshylar Almaty qalasynyń basshylyǵyna jáne jetekshi sarapshylarǵa jańa sıfrlyq servıster men ónimderdi tanystyrady. 18 qyrkúıekten 3 qazanǵa deıin komandalardan ótinimder qabyldanady, ıaǵnı komandanyń árbir múshesi tirkeýden ótýi tıis.
Hakatonnyń birinshi kúni komandalar qurylyp, ıdeıalar pıtchıngimen, mentorlar jáne qazylar alqasymen tanysýdan bastalady. Olardyń quramynda sarapshylar, kásipkerler men otandyq kompanııalardyń basshylary bar. Sondaı-aq qatysýshylar ekologııa, trafık jáne keptelis, kreatıvti ekonomıka, medısına, qaýipsizdik, qoǵamdyq kólik, bilim jáne TKSh taqyryptary boıynsha tapsyrmalar alady.
Hakatonnyń sońǵy kúni komandalar prototıpterimen qazylar alqasy tanysady. Barlyq qatysýshyǵa sertıfıkattar berilip, jeńimpazdar ákimniń aqshalaı syılyǵyn: birinshi oryn - 1,5 mln teńge, ekinshi oryn - 1 mln teńge, úshinshi oryn alǵandar 500 myń teńge alady. Qazylar alqasy jobanyń ıdeıasy, ony iske asyrý, ilespe materıaldarǵa nazar aýdarady. Basty talap boıynsha joba hakatonda ázirlenip, tyń usynys retinde qatysýshylardyń buǵan deıingi jobalaryn qaıtalamaýy shart.
ALMATY