Dúnıede ananyń armanynan asqan bıiktik joq. О́ziniń ózegin jaryp shyqqan perzentimen qosa ana búkil dúnıedegi balalar ataýlynyń da qamqory, janashyry. Balanyń densaýlyǵyna alańdaıtyn da ana.
Jýaly aýdanynyń turǵyny Damıra Joljanqyzy búgingi tańda aýdandaǵy alǵashqy qanatqaqty jobany iske asyryp, balalarǵa qamqorlyq kórsetip keledi. Joldasy ekeýi óz qarajattaryna aýdan ortalyǵy Baýyrjan Momyshuly aýylynan «Jýaly» beıimdeý jáne ońaltý ortalyǵyn ashty. Damıra Joljanqyzynyń bul bastamasyna sebep bolǵan úlken uly Erasyldyń jaǵdaıy eken. Búginde 14 jasqa kelgen Erasyldyń sóılemeıdi degeni bolmasa, anasy onyń sýret ónerine degen qyzyǵýshylyǵy joǵary ekenin, túrli taqyryptarǵa sýretter salatynyn da aıtty.
Atalǵan ortalyq 25 balaǵa arnalǵan. Qazirgi kezde munda 10 múmkindigi shekteýli bala qabyldanǵan. Bul ortalyqqa tek múgedektigi tanylǵan balalar ǵana alynady eken. Munda mamandar balalardy ómirge beıimdep, olarǵa kúndelikti sóıleýdi jáne ózin ózi qamtamasyz etýdi úıretedi. Sonymen qatar ortalyqta logoped, psıholog, defektolog mamandary, tárbıeshiler men bala kútýshiler jumys isteıdi. Qozǵaý tiregi buzylǵan balalarǵa arnalǵan arnaıy massaj jasaýshy da bar.
«Talaı ýaqyt boıy bos turǵan ǵımaratty jalǵa alyp, atalǵan ortalyqty ashtyq. Onyń jóndeý jumystaryna, balalarǵa qajetti zattar alýǵa biraz qarajat ketti. Aýdan ákimi Narbaı Ergebekov bizdiń bul bastamamyzdy qoldap, ǵımaratty arzan baǵamen jalǵa alýǵa kómektesti. Endi Úkimet tarapynan qoldaý bolsa eken degen tilegimiz bar. Biz múmkindigi shekteýli balalarmen qatar, olardyń ata-analaryna da kómek kórsetsek dep oılaımyz», deıdi Damıra Joljanqyzy.
Qazirgi kezde ortalyqta 9 adam jumys isteıdi. Negizi 13 qyzmetker bolý kerek eken. Alaıda ortalyq jetekshisi qarajattyń jetispeýshiligine baılanysty qosymsha mamandar shaqyrýǵa múmkindik bolmaı otyrǵanyn jetkizdi. Al alǵashqy bir aıda ata-analar 10 myń teńgeden tólegen bolsa, keıinnen bul da tegin bolǵan. Joba jetekshisi eń bastysy balalar men ata-analarǵa kómek kórsetý nıetinde ekenin aıtty. Sonymen qatar, munda balalarǵa 5 mezgil tamaq beriledi. Arnaıy ınvataksı balalardy tańerteń úıinen alyp ketip, keshke úıine aparyp salady eken. «Balalarǵa arnap kilem, tósek sııaqty birtalaı zat aldyq. Ǵımaratqa jóndeý jumystaryn júrgizdik. Jalpy, jumysty bastaýǵa 3 mln teńge jumsaldy. Áli de talaı zat jetispeıdi. Sonymen qatar ortalyq qyzmetkerlerine de aılyqty ózimiz tóleımiz», deıdi Damıra Joljanqyzy.
Jambyl oblysy