BUU Bas Assambleıasy 74-shi sessııasynyń alańynda Memleket basshysy Qasym-Jomart Toqaev Shveısarııa Prezıdenti Ýlı Maýrermen ekijaqty kezdesý ótkizdi. Bul týraly Aqordanyń baspasóz qyzmeti habarlady.
Kezdesý barysynda memleketter basshylary ekijaqty kún tártibindegi keń aýqymda ózekti máselelerdi talqylady.
Qasym-Jomart Toqaev Qazaqstan-Shveısarııa arasyndaǵy yntymaqtastyqtyń joǵary deńgeıde ekenin atap ótti.
– Shveısarııa – Qazaqstan úshin eki jaqty saýda jáne ınvestısııa kólemi boıynsha Eýropadaǵy negizgi áriptes. Bizdiń elderimiz bank, qurylys jáne agrarlyq salalardaǵy jobalardy belsendi damytyp keledi, – dedi Qasym-Jomart Toqaev.
Qazaqstan Prezıdenti shveısarııalyq áriptesiniń nazaryn qarjylyq qyzmetter, mashına jasaý, hımııa jáne farmasevtıka, aýyl sharýashylyǵy, azyq-túlik, týrızm salalarynda birlesip atqarar birqatar perspektıvalyq jobalardyń bar ekenine aýdardy.
Kezdesý sońynda Qasym-Jomart Toqaev Ýlı Maýrerdi bıyl Qazaqstanǵa resmı saparmen kelýge shaqyrdy.