Atyraýda osyndaı taqyrypta ótken respýblıkalyq plenerge elimizdiń túkpir-túkpirinen 20 sýretshi jınaldy. Jylyoı aýdanyndaǵy Aqmeshit qorymy, Imanqara úńgiri, Aqkegershin bor taýy, Ushqan ata qorymy, Qulshan ata meshiti, Jem ózeniniń tabıǵaty bes kún boıy qylqalam sheberleriniń shabytyna arqaý boldy.
Uly Jibek jolynyń boıyndaǵy bul tarıhı-mádenı nysandar qazir memleket qaraýynda.
– Elbasynyń «Bolashaqqa baǵdar: rýhanı jańǵyrý» baǵdarlamalyq maqalasy aıasynda uıymdastyrylǵan shara Atyraý aımaǵyndaǵy kıeli jerlerdi dáripteýge, sýretshilerdiń ózara yntymaqtastyǵyn nyǵaıtyp, tájirıbe almasýlaryna jaǵdaı jasaýǵa baǵyttalǵan. Qylqalam sheberlerin de plenerdiń taqyryby qyzyqtyrdy, olardyń arasynda Jylyoı jeriniń keń jazıra dalasyn, «Kıeli jerler geografııasyna» engen nysandardy salǵandar, sondaı-aq Jem ózeniniń qazirgi qıyn ahýalyn sýret arqyly kórsetkender de boldy, – deıdi Sh.Sarıev atyndaǵy kórkemsýret jáne qoldanbaly-sándik óner mýzeıiniń basshysy Tólegen Orynbasaruly.
Plener jumysyna qatysýshylardyń biri – Qazaqstannyń jáne Qyrǵyzstannyń eńbek sińirgen qaıratkeri Ilıa Jaqanov. Kompozıtor, óner zertteýshisiniń taǵy bir qyry – ol tamasha sýretshi. Tipti jasy 70-ten asqanda H.Dosmuhamedov atyndaǵy Atyraý memlekettik ýnıversıtetinde beıneleý óneri jáne dızaın mamandyǵy boıynsha bilim aldy. Aımaqta ótetin sýretshilerge baılanysty sharalardyń bárine belsendi qatysatyn Ilıa Jaqanov: «Jibek joly ótken qasıetti jerdiń topyraǵyn basyp, Jem ózeniniń jaǵasynda shyǵarmashylyqpen aınalysý, osy kıeli nysandardy qaǵaz betine túsirý erekshe áser syılady», deıdi.
Sýretshilerdiń shyǵarmashylyq jumystarynan arnaıy kórme uıymdastyryldy. Al plenerde salynǵan sýretter oblystyq mýzeıdiń sánin keltirip turatyn bolady.
ATYRAÝ