Almaty oblysynyń Qarasaı aýdanyndaǵy «Batyr babalar» memorıaldy kesheni osydan eki jyl buryn ǵana ashylǵan edi. Qazir bul keshen óńirdegi tanymal tarıhı orynǵa aınaldy.
Qazaq tarıhynyń qalyń qatparynan syr shertetin shejirelik sýrettermen árlengen bul keshen babalardyń erlik jolyna qoıylǵan eskertkish sııaqty. Kıiz úı beıneli memorıaldy keshenniń ishi-syrty aq mármár taspen qaptalǵan. Kókke umtylǵan bıik stella bolattan quıylyp, súıirlene bitken kúmbezdi shatyrǵa úılesip tur.
Mundaǵy ejelgi saq zamanyna arnalǵan ekspozısııanyń ózi bir álem. Uzyndyǵy 15, eni 3 metr bolatyn Tumar hanshaıymnyń zamanyn beıneleıtin, sol kezeńdegi urys dalasyna jeteleıtin panoramanyń jóni jáne bólek. Altyn adam dáýirinen jetken jádigerler, tutas dala órkenıetiniń bólshegindeı kórinetin qolóner men usta qolynan shyqqan buıymdar da ejelgi dúnıege shaqyratyndaı...
Al nysan qabyrǵasynda memlekettilik shejiresi jyldar legimen órilip, Qazaq handyǵynyń qurylýy men búgingi táýelsiz elimizdiń arasyndaǵy ǵasyrlarǵa sozylǵan soqtyqpaly-soqpaqsyz tarıhtyń ár sáti kórkem sýrettermen bezendirilipti. Ǵımarat ishi quddy bir batyr babalarymyzdyń zamany qazirgi urpaǵyna «Uly dala tarıhy osylaı jazylǵan...» dep til qata jóneletindeı kórkemdik pen tylsym syrǵa tunyp tur. Memorıaldy keshendi aralaýǵa Almaty mańyndaǵy aýdandardyń mektep oqýshylary ynta tanytyp, jıi keledi eken. Tipti tarıh sabaǵyn osynda kelip ótkizetin tájirıbe qalyptasýda.
Jalpy kólemi 465 mıllıon teńge shamasynda qarjy quıylǵan keshenniń irgetasynan shatyryna deıingi qurylysy demeýshilerdiń kómegimen salynsa, árleý, bezendirý men kórkemdeý jumystaryna jumsalǵan qarjy ǵana oblystyq bıýdjetten bólingen eken.
Almaty oblysy