L.N.Gýmılev atyndaǵy Eýrazııa ulttyq ýnıversıtetinde Sybaılas jemqorlyqqa qarsy is-qımyl agenttigi «Adaldyq alańy» aıasynda «Ádep» jobalyq keńsesi ashyldy.
Saltanatty sharaǵa Sybaılas jemqorlyqqa qarsy is-qımyl agenttigi tóraǵasynyń birinshi orynbasary Oljas Bektenov, EUÝ rektory Erlan Sydyqov, M.S.Nárikbaev atyndaǵy QazMZÝ rektory Talǵat Nárikbaev jáne Nur Otan partııasy, Bilim jáne ǵylym mınıstrligi, Nur-Sultan qalasy ákimdigi, elordanyń Almaty aýdany ákimdigi ókilderi men basqa da uıym-mekemelerdiń jetekshi tulǵalary qatysty.
Keńse L.N. Gýmılev atyndaǵy Eýrazııa ulttyq ýnıversıteti men Sybaılas jemqorlyqqa qarsy is-qımyl agenttiginiń birlese qol qoıǵan memorandýmy negizinde jumys isteıdi.
Memorandýmǵa EUÝ rektory Erlan Sydyqov jáne Sybaılas jemqorlyqqa qarsy is-qımyl agenttigi tóraǵasynyń birinshi orynbasary Oljas Bektenov qol qoıdy.
Keńseniń mindeti – ýnıversıtette jemqorlyqqa qarsy jumys josparynyń negizgi baǵyttaryn júzege asyrý. Sonymen qatar korrýpsııaǵa qarsy is-sharalar josparyna sáıkes birlesken sharalar keshenin iske asyrý, oqý oryndary qyzmetiniń ashyqtyǵy men aıqyndylyǵyn qamtamasyz etý, ýnıversıtette sybaılas jemqorlyqqa tózimsizdik týraly túsindirý jumystaryn, sybaılas jemqorlyqqa qarsy profılaktıkalyq is-sharalar júrgizý, quqyq qorǵaý organdarynyń bilim alýshylar men qyzmetkerler arasynda kezdesýlerin uıymdastyrý sııaqty fýnksııalardy atqarady.
– Elbasy jáne partııa Tóraǵasy N.Á.Nazarbaev 2019 jyly 21 tamyzda ótken Nur Otan partııasy saıası keńesiniń keńeıtilgen otyrysynda joǵary bilim salasynda jemqorlyqty boldyrmaý týraly naqty tapsyrma bergen. Al adaldyq alańy – ómirimiz ben qyzmetimizdiń qalypty, tabıǵı úderisine aınalýy kerek, – dedi rektor Erlan Sydyqov.
Sondaı-aq ádep – tártip pen mádenıettiń, jaýapkershilik pen jasampazdyqtyń túıisken alańy bolatynyn, bul jobalyq keńes ýnıversıtette jemqorlyqqa qarsy jumys josparynyń negizgi baǵyttaryn aıqyndap, júzege asyratynyn jáne Sybaılas jemqorlyqqa qarsy is-qımyl agenttigimen birlese otyryp, korrýpsııaǵa qarsy is-sharalar josparyn júzege asyrýdy kózdeıtinin jetkizdi.
О́z kezeginde sóz alǵan Agenttik tóraǵasynyń birinshi orynbasary Oljas Bektenov: «Bul memorandým «Adaldyq alańy» aıasyndaǵy Eýrazııa ulttyq ýnıversıtetiniń sapaly jumysyna serpin beredi dep senemiz. El bolashaǵy jolyndaǵy qyzmetimiz jemisti, tabysty bola bersin», dedi.
Qatysýshylar is-shara aıasynda «Jazý tarıhy» murajaıyn aralap, oqý úrdisin uıymdastyrý jáne monıtorıng, tirkeý-ofısi bólimderiniń, bilim alýshylarǵa qyzmet kórsetý ortalyǵynyń jumysymen tanysty.
«Egemen-aqparat»