Qazannyń 2-si - qazaqtyń qaharman qyzy Mánshúk Mámetovanyń týǵanyna 97 jyl toldy. Bul kúndi batyrdyń jerlesteri erekshe atap ótti.
Bıyl jazda Saıqyn aýylynan on segiz shaqyrym jerden 1941 jyly Stalıngrad maıdanyna jol tartqan jaýyngerlerdiń múrdesi tabylǵan edi. Fashıst ushaqtarynyń shabýylyna ushyrap, súıegi temirjol janynda qalǵan 15 bozdaqtyń súıegi dál osy kúni qurmetpen jerlendi.
«Naryn» izdestirý tobynyń múshesi Aıym Hamıdolla aıtqandaı, osy jyly maýsym aıynda temirjol boıyndaǵy №65 Ravnınnyı stansasy tusynda qazba jumystary júrgizilgen bolatyn. Sóıtip, sonaý soǵys jyldary Stalıngradqa kómekke attanǵan teńizshi atqyshtar brıgadasy jaýyngerleriniń múrdesi tabylǵan edi.
– Búgingi úndes eki sharanyń bir kúnde ótkizilýi zańdylyq. О́ıtkeni, Mánshúk apamyz jıyrma bir jasynda qaza tapsa, jerlengeli otyrǵan jaýyngerlerdiń orta jasy da 18-22 jas eken. О́rimdeı jastar estip-bilmegen Bókeı dalasynda oqqa ushty. Uly Otan soǵysy – eki shańyraqtyń biri qara jamylǵan úlken qasiret. Bizdiń aýdanymyzda soǵys jańǵyryǵy áli de bar. О́ıtkeni, biz Stalıngrad maıdanynyń eń jaqyn tyly boldyq. Myna temirjol boıy jaý bombasynyń astynda qaldy. Beıbit kún, ashyq aspannyń qadirin bileıik. Bul beıbitshilik bizge aǵa-apalarymyzdyń qanymen kelgen,-dedi Bókeı ordasy aýdanynyń ákimi Nurlan Raqymjanov.
Eńbek ardageri, ustaz Noqash Qadımovtyń aıtýynsha, baýyrlastar soǵys kezinde oqqa ushqan jaýyngerlerdiń súıegin jınap, ıt-qusqa jem bolýdan saqtap qalǵan Saqyp О́teǵalıeva, Natasha esimdi apalarymyz eken. Al soǵys qurbandarynyń arnaıy baýyrlastar zıratyna jerlenýine bastamashy bolǵan - sol kezderi el basqarǵan Shynybaı Sharafeddınov esimdi azamat eken.