Kez kelgen tirshilik ıesiniń taǵdyry taqtaıdaı túzý joldan turmaıtyny belgili. Búgin qýanyp júrseń, erteń qýaryp, búgin kól bolyp júrseń, erteń shól bolyp qalýyń taban astynda. Adamnyń bir aty pende bolǵan soń qazir ne kútip turǵanyn boljaı almasa da, bir jyldyǵyn josparlap tastaıdy. «Qudaıdyń buıryǵynsyz qýraı da synbaıtynyn» bilmegendikten qudireti jetpes nársege qulshynyp, shamadan tys sharýa atqaramyn dep sharshaıdy.
Joly bolmaı jospary buzylsa, ómirge ókpe aıtatyndar bar. Apatqa ushyrap aman qalsa da Allaǵa shúkir aıtyp, júregi soǵyp turǵanǵa qýanatyndar qanshama. Jalǵan ómirdi jan-tánimen súıetin jandar úshin kez kelgen kedergi qarsy tura almas qaıǵymen teń. Al tirshiliktiń mánin tereń túsingender úshin aýa jutyp, aman-esen jer basyp júrgenine jetetin nyǵmet joq.
Bizdiń keıipkerimiz Birjan da synaqqa synbaı, qıyndyqqa qıylyp ketpeıtin qaıratty jan. Onyń qaıraty aıaǵynan aırylsa da aıanbaı eńbek etip, aınalasyndaǵy múmkindigi shekteýli jandarǵa da jumys taýyp berip, olardy tabandylyqqa tárbıelep, namysyna qamshy basýynda deýge bolady. Birjan búgingi tańda «Ǵıbadat» JShS dırektory, «Demeý» múgedekterdi qoldaý qoǵamynyń tóraǵasy.
«Burynǵy jumysym jol saqshysy edi. Sol qyzmette júrgende aıazda aıaǵymdy úsitip aldym. Ol kezde jasym otyzdan endi asqan bolatyn. Dárigerler aıaǵymdy kesip, aýrýhanadan qol arbamen bir-aq shyqtym. Alǵashqy jyldary aýyr bolǵanyn jasyrmaımyn. Kóptegen dosym menen teris aınalyp ketti. Sol kezde ózimdi dáleldegim keldi», deıdi Birjan.
Iá, basyńa is túskende bas saýǵalap qashatyn jandar az emes. Osyndaı pendeshilik peıildegi adamdardyń qarym-qatynasy Birjannyń namysyna qamshy bolyp, qaıratyn oıatyp jeke kásip ashýyna jetelegen eken. Ol búgingi tańda qazaqy oıýlarmen bezendirilgen sandyq, besik jáne túrli jıhazdar jasaýmen aınalysady. Aınalysyp qana qoımaı ózge jandardy da turaqty jumyspen qamtamasyz etip otyr.
«Qazir men ózimdi dáleldep qana qoımaı, on eki múshesi saý adamǵa da, múmkindigi shekteýli jandarǵa da jumys taýyp berip, olardyń nápaqa tabýyna óz úlesimdi qosýdamyn. Osy dárejege jetkizgen namys pen qaırat dep oılaımyn. Jalpy mende mundaı kásip ashamyn degen oı bolǵan joq. Negizgi josparym sal aýrýymen aýyratyn balalarǵa qımyl-qozǵalys apparatyn jasaý edi. Sol arqyly qoǵamǵa bir paıdam tıgenin jáne sol qurylǵyny alǵan balalar da basqalar sııaqty júrip ketse eken degen armanym boldy. Shynymen de qarap otyrsaq, sal aýrýyna shaldyqqan balalardy ońaltý ortalyǵy elimizdiń iri qalalarynda ǵana bar eken. Osyndaı ortalyqtar kishigirim qalalarda da bolsa dep oılaısyń. Bizdiń maqsatymyz memlekettiń bir jaǵyna shyǵysyp, qolymyzdan kelgenshe paıdamyzdy tıgizý», deıdi Birjan Qojaqov.
Sózimizge dálel bolsyn, ol elimiz boıynsha sal (DSP) aýrýymen aýyryp, tósek tartyp jatqan syrqat balalarǵa arnap vertıkalızatordy tegin jasap bergen. Saýapty iske umtylǵan azamattyń alǵan baǵyty aıryqsha. Maqsaty – tabys taýyp qana qoımaı, aınalasyndaǵy jandarǵa jan-jylýyn tógý. Segiz jyl ǵumyryn memlekettik qyzmetke arnaǵan onyń jeke kásibin jetildirip, júıeli júrgizip áketýi – qajyrly qaıraty men óz-ózine degen seniminiń nátıjesi bolsa kerek. «Ǵıbadat» jaýapkershiligi shekteýli seriktestigin qurǵan búgingi keıipkerimiz saý adamǵa da, sal adamǵa da úlgi.
««Ǵıbadat» jaýapkershiligi shekteýli seriktestigi keńsege arnalǵan korpýsty jıhaz túrlerin, úıge arnalǵan jıhazdar, oqý oryndary men mektep jasyna deıingi balalar mekemelerine arnalǵan jıhazdardy, sonymen qatar buıymdardyń júzden astam túrin daıyndaıdy. Onyń ishinde ulttyq naqyshtaǵy jer ústeli, sandyq, besik sekildi jıhazdar da kiredi. Shyǵarylatyn ónimniń túrleri árdaıym naryqtyń jańa betalysyna sáıkes jańa buıymdarmen tolyqtyrylyp otyrady. Jıhazdardyń kóptúrliligi men alýan tústiligi talǵampaz tapsyrys berýshilerdiń kóńilinen shyǵýda. Árbir tapsyrys berýshiniń babyn tabýdyń nátıjesinde erekshe árlengen baǵasy men sapasy qolaıly jıhazdar daıyndap otyrady. Barsha ónim sheteldik jabdyqtardyń kómegimen jasalady. Jıhazdyń sapaly bolýy bilikti mamandar jáne qyzmetkerler eńbegimen óndiristi basqarý júıesiniń joǵary dárejedegi uıymdastyrylýyna baılanysty. Jıhazdar Qazaqstannyń kez kelgen bóligine EMS kazpost poshta qyzmeti arqyly jóneltiledi. Kásiporyn memlekettik satyp alý portalynyń tapsyrystaryna belsene aralasyp, adal jabdyqtaýshy retinde tanylyp otyr. «Ǵıbadat» jaýapkershiligi shekteýli seriktestiginiń ustanymy sapaly, jaıly jıhazdy tómen jáne básekeli baǵalarmen usyna otyryp, qarapaıym adamdardyń kúndelikti ómirin jaqsartý. Sondyqtan «Ǵıbadat» jaýapkershiligi shekteýli seriktestigi óz tutynýshylarynyń senimi men qurmetin baǵalaıdy jáne ózara tıimdi yntymaqtastyqta jumys isteýge árqashan daıyn», deıdi keıipkerimiz.
Eske sala ketsek, 2017 jyly Birjan Qojaqov «Múgedek jandarǵa kórsetken qamqorlyǵy úshin» atalymy boıynsha «Altyn júrek» ulttyq qoǵamdyq syılyǵynyń ıegeri atanyp, bıyl Elbasynyń Alǵys hatymen marapattaldy. Árıne mashaqattyń marapatyn kórgenge eshteńe jetpeıdi. Qolynan keletin kómekti aıamaıtyn abzal azamattyń izgilikke toly isi kimdi bolsyn súısindirmeı qoımasy anyq.