Kásipodaq bedelin kóterýdi kózdeıdi

Kezdesýge oblys ákiminiń oryn­basary Serik Egizbaev, áleý­mettik áriptester, «Memle­kettik, bank mekemeleri jáne qoǵamdyq qyzmet kórsetý qyzmetkerleriniń salalyq kásiptik odaǵy» qoǵam­dyq birlestiginiń tóraǵasy Mır­bolat Jaqypov qatysty.

– Áleýmettik turaqtylyqty qamtamasyz etý, ekijaqty serik­tes­tikti damytý maqsatynda ká­sipodaqtar mekemelermen ty­ǵyz baılanysta jumys isteýi qajet. Kez kelgen eńbek daýyn mámilemen sheshýge bolady. Kez kelgen kelispeýshilik aldymen ujym ishinde rettelýi kerek. Al kásipodaqtar osy máselelerdi daý-damaıǵa jetkizbeı, ońtaıly sheshýge tikeleı aralasyp, ony sheshý joldaryn qarastyrýy qajet. Bizdiń mindetimiz – kásip­odaqtyń naqty jumysyn, qol jetkizgen nátıjelerin kórsetý arqyly kásipodaqtyń bedelin kóterý – dedi Eraly Luqpanuly.

Kezdesýde kásipodaq múshe­ligin arttyrý, kásipodaǵy joq mekemeler men kompanııalarda uıym qurý, eńbek adamynyń quqyǵyn qorǵaý, olarǵa qaýipsiz eńbek jaǵdaıyn jasaý, ujymdyq sharttardyń sany men sapasyn art­tyrý sııaqty máseleler kóterildi.

Oblystyq kásipodaqtar orta­ly­ǵynyń tóraıymy Aı­gúl Orazqyzy «Qazaqstan Res­pýb­lıkasy Kásipodaqtar fede­ra­sııasyn jańǵyrtý Jol karta­synyń» óńirde júzege asýy jóninde sholý jasady. «Mem­lekettik, bank mekemeleri jáne qoǵamdyq qyzmet kórsetý qyzmet­kerleriniń salalyq kásiptik odaǵy» oblystyq fılıalynyń tóraǵasy S.Súleımen, «Salalyq mádenıet, sport jáne aqparat qyzmetkerleriniń kásiptik oda­ǵy» qoǵamdyq birlestiginiń oblystyq fılıalynyń tóraǵasy A.Batyrhanov, «Qazaqstandyq salalyq bilim jáne ǵylym qyz­met­kerleri kásiptik odaǵynyń oblystyq uıymy» qoǵamdyq birles­tiginiń tóraǵasy M.Daýpaev, «SENIM» densaýlyq saqtaý jú­ıesi jumyskerleriniń salalyq kásip­odaǵy» respýblıkalyq qoǵam­­dyq birlestiginiń oblys­tyq fı­lıalynyń tóraǵasy M.Qu­saıynov óz salalarynda jyl boıy atqarǵan qyzmeti boıynsha málimet berdi.

Kezdesý sońynda tóraǵa sala­lyq jáne jergilikti kásipodaq uıymdary tóraǵalary jáne kezdesýge qatysýshylarmen pikir almasyp, oı bólisti. Budan keıin Fede­rasııa tóraǵasy turǵyn úı-kom­mýnaldyq sharýashylyq sa­lasynyń 1 myńnan astam qyz­met­kerin biriktiretin iri mekeme – «Jaıyqjylýqýat» AQ bas­shylyǵy jáne kásipodaq múshe­lerimen kezdesti.

 Batys Qazaqstan oblysy