Qyzylordada «Qazaq Epos» respýblıkalyq aǵartý jobasy aıasynda uıymdastyrylǵan «Tulpar minip, tý alǵan!» baıqaýynyń oblystyq kezeńi ótti. Elbasynyń «Bolashaqqa baǵdar: rýhanı jańǵyrý» jáne «Uly dalanyń jeti qyry» maqalalaryndaǵy mindetterdi arqaý etken sharaǵa «Qobylandy batyr» jyrynyń Marabaı jyraý jyrlaǵan nusqasyn jatqa aıtýdan aýdan men qalada ótken irikteýlerden ozyp shyqqan 27 oqýshy qatysty.
Byltyr qazaq epostarynyń arasyndaǵy shoqtyǵy bıik «Alpamys batyr» jyryn aıtýdan bastalǵan saıys bıyl «Qobylandy batyrǵa» ulasyp, «Qazaq Epos» qoǵamdyq qorynyń bul bastamasyn kúlli respýblıka qoldap áketkeni belgili. О́skeleń urpaqty halqymyzdyń rýhanı asyl murasymen sýsyndatyp, erlik pen eldikke tárbıelep, batyrlyqqa baýlıtyn baıqaýǵa bıyl oblys boıynsha 2733 bala qatysypty. Solardyń arasynan ozyp shyqqan 27 órenniń ónerin belgili jyraý, Qazaqstannyń eńbek sińirgen qaıratkeri, Qazaq Ulttyq О́ner ýnıversıtetiniń professory Almas Almatov bastaǵan qazylar alqasy baǵalady.
Saıys aldynda qatysýshylarǵa sáttilik tilegen qazylar alqasynyń tóraǵasy 132 bet, 5206 joldan turatyn jyrdy jatqa aıtý ońaı emestigin atap ótti. «Biz qazaq jyryn belgili bir deńgeıge deıin jyrladyq, endi ony ári qaraı jalǵaýdy osy jastarǵa tapsyramyz. Bul ulttyń jadyn jańǵyrtyp, ótkenimizdi ónege etýdiń jarqyn bastamasy» degen jyraý sózi shara mańyzyn aıshyqtaı tústi.
Shartqa sáıkes, oqýshylar sahnada alǵashynda juptasyp óner kórsetti. Osy synnan iriktelgen 8 oqýshy ekinshi aınalymda jyrdyń ishindegi kónergen, tarıhı sózderdiń maǵynasyn ashyp, synybyna sáıkes qazaq ádebıeti oqýlyǵy boıynsha ázirlengen suraqtarǵa jaýap berdi. Epostaǵy eski sózderdi tarata aıtyp, saýaldarǵa barynsha tııanaqty jaýap bergen órenderdiń talabyna rıza boldyq. Qazylar bul synda teń túsken 8 balany kelesi aınalymǵa shyǵaryp, onda oqýshylar jyrdyń belgili bir tusyn jatqa aıtýdan jarysty.
Bes saǵatqa sozylǵan saıys qorytyndysynda oblys ákiminiń orynbasary Naýryzbaı Baıqadamov jeńimpaz júldesi – 1000 000 teńgeni Qazaly aýdanyndaǵy №129 mekteptiń 10 synyp oqýshysy Gúlzıra Qonysbaıǵa tabystady. Ekinshi oryn báıgesi – 600 000 teńgeni Qarmaqshy aýdanyndaǵy №272 orta mek- teptiń 8 synyp oqýshysy Daıana Tolybaeva aldy, úshinshi oryn qazalylyq órenniń úlesine tıip otyr. Osy aýdandaǵy №170 mekteptiń 7 synybynda oqıtyn Gaýhar Ázen 300 000 teńgeni ıelendi.
Osy kúni Ustazdar kúnine oraı ótken keshte oqýshylardy jyr saıysyna daıyndaǵan jetekshilerine de erekshe qurmet kórsetildi. Oblys ákimi Qýanyshbek Ysqaqov jeńimpaz oqýshynyń muǵalimi Gúlfaırýz Álishevaǵa 2 000 000 teńge, júldeger shákirtterdi jarysqa ázirlegen Mereke Qaınarova men Jadyra Kóshekbaevalarǵa 1 200 000 jáne 600 000 teńgeniń sertıfıkattaryn saltanatty jaǵdaıda tabys etti.
Murat JETPISBAEV,
jýrnalıst
Qyzylorda