Qostanaı oblysynyń Zarechnyı kentindegi «Arǵymaq» ıppodromynda bıylǵy Ulttyq at sporty oıyndary maýsymynyń jabylý saltanaty ótti. Sportshylar qyz qýý, teńge ilý, aýdaryspaq, taı jarys, qunan báıge, alaman jarys, kókpar sııaqty ulttyq oıyndarda jarysqa tústi. Bul týraly oblystyq Polısııa departamentiniń baspasóz qyzmeti habarlady.
Oblystyq chempıonatqa Qostanaı oblysynyń quramasy men Polısııa departamentiniń «Dınamo» komandasy, sondaı-aq, Maılın, Sarykól, Áýlıekól, Denısov aýdandarynyń sportshylary qatysty.
Toptyq kezeńde polısııa shabandozdary Qostanaı oblysynyń quramasyn 7:1 esebimen, Sarykól aýdanyn 3:0 esebimen tize búktirdi. Fınaldyq básekede tártip saqshylary taǵy da oblys quramasymen kezedesti. Departament komandasy birinshi sekýndtan bastap óz myqtylyǵyn kórsetti. Uıymdasqan oıyn nátıjesinde polısııa qyzmetkerleri qarsylastarynan taǵy da basym tústi. Bul joly polıseıler 3:0 esebimen jeńiske jetti.
- Bala kezimnen at ústindemin. Polısııada kavalerııalyq vzvod bar, meniń qyzmettik atym «Oqjetpes». Bizdiń komandamyzda 12 adam bar. Polısııadan bólek, TJM men IIM Akademııasy qyzmetkerleri de bar. Oıyn 40 mınýt ótti, árqaısysy mańyzdy boldy. Qarsylastar myqty. Men komandada shabýylshymyn, sondyqtan maǵan úlken jaýapkershilik júkteldi, - dep atap ótti JQAJ ınspektory Baqdáýlet Asanov.
- Bizdiń jigitter shymyr. Komandaǵa óz isiniń sheberleri jınalǵan, olar alańda bir-birin jaqsy túsinedi. Aldaǵy ýaqytta biz daıyndyqty kúsheıtetin bolamyz, - deıdi «Dınamo» kókpar komandasynyń jetekshisi, JQAJ komandıri Jánibek Muhamedjanov.
Esterińizge sala keteıik, bul bıylǵy birinshi jeńis emes, jyl basynan beri Qostanaı oblysy Polısııa departamentiniń komandasy «Naýryz-2019» respýblıkalyq týrnırinde jáne 9 mamyr Jeńis kúnine arnalǵan oblystyq týrnırde jeńiske jetken bolatyn.