Taldyqorǵan qalasynda Jetisy Invest-2019 halyqaralyq bıznes-forýmy ótkizildi. Forýmǵa qatysýshylar jalpy somasy $859,7 mln bolatyn 13 joba boıynsha kommersııalyq kelisimderge qol qoıdy.
Is-sharaǵa Syrtqy ister mınıstriniń orynbasary Ermek Kósherbaev, Almaty oblysynyń ákimi Amandyq Batalov, «KAZAKH INVEST» UK» AQ Basqarma tóraǵasynyń orynbasary Birjan Qaneshev, sondaı-aq álemniń 7 elinen dıplomatııalyq korpýstyń, iri otandyq jáne transulttyq kompanııalardyń, sheteldik jáne otandyq bıznesmenderdiń, múddeli memlekettik organdar men qarjy uıymdarynyń 400-den asa ókili qatysty.
A.Batalov atap ótkendeı, álemdik ekonomıkalyq daǵdarys pen jalpy ınvestısııalyq aǵynnyń tómendegenine qaramastan, 2014-2016 jyldary Almaty oblysyndaǵy ishki ınvestısııalar 27%-ǵa ósti, 2018 jyldyń qorytyndysy boıynsha Almaty oblysy shıkizattyq emes óńirler ishinde syrtqy ınvestısııalardy tartý boıynsha birinshi orynǵa shyqty, onyń kólemi jyl saıyn 2016 jyldan bastap 20%-ǵa ósýde.
О́z kezeginde B.Qaneshev elde ınvestısııalyq qyzmet úshin qolaıly klımatty ustaýdyń mańyzdylyǵy týraly aıtyp berdi. «El Úkimeti úzdik álemdik tájirıbeni tartýdy jáne engizýdi tapsyra otyryp, memlekettegi ınvestısııalyq klımatty jaqsartý úshin birqatar reforma júrgizdi. Qazirgi ýaqytta bizde sheteldik bıznesmenderdi súıemeldeýdiń úsh deńgeılik júıesi qyzmet etedi. Syrtqy deńgeıde Qazaqstannyń sheteldik ókildikteri, ortalyq deńgeıde «KAZAKH INVEST» jáne úshinshi deńgeıde «bir tereze» qaǵıdaty boıynsha qyzmet etetin óńirlerdegi front-ofıster», dedi ol.
Sondaı-aq óńirdegi ózderiniń sátti tájirıbelerin Leroy-Merlin, «Mareven Fýd Tıan-Shan», «Waste Energy KZ», «ArKazInvest», taǵy basqa iri jáne transulttyq kompanııalardyń ókilderi baıandap berdi.
Sonymen qatar forým barysynda óńir JEK jobalaryn iske asyrý úshin qolaıly ekeni aıtyldy. Osylaısha Qazaqstandaǵy 74 jańartylatyn energııa kózderiniń 24-i Almaty oblysynda jumys isteıdi. Iri sıngapýrlyq ınvestordyń qatysýymen Universal Energy kompanııasy salǵan qýattylyǵy 100MVt bolatyn Qazaqstannyń iri kún elektrstansalarynyń biri qyrkúıek aıynda iske qosyldy. Kelesi jyly osy kompanııa árqaısysynyń qýattylyǵy 50MVt bolatyn eki kún jáne jel elektrstansalarynyń iske qosylýyn josparlaýda. Budan basqa, JEK 28 jobasy iske asyrylýdyń túrli kezeńderinde.
Búgingi kúni Almaty oblysy boıynsha «KAZAKH INVEST» UK» AQ monıtorıngtik júıesinde sheteldik ınvestorlardyń qatysýymen jalpy somasy $3,8 mlrd quraıtyn 34 joba bar. Onyń ishinde 12 joba boıynsha qurylys-montajdaý jumystary júrgizilýde, 12 joba boıynsha jobalyq qujattama ázirlenýde, al 10 joba óńirde iske asyrý úshin pysyqtalý kezeńinde. Jalpy, jyl sońyna deıin 1200 jumys orny qurylatyn 10 jobanyń iske asyrylýy josparlanǵan.