Shymkentte qaterli isik aýrýyn erte satysynda anyqtaıtyn «PET» ortalyq ashylady. Osylaısha, mıllıonnan astam turǵyny bar Shymkent qalasynyń halqy endi sapaly em izdep Nur-Sultan, Almaty qalalaryna sabylmaıtyn boldy.
Qaterli isikke shaldyqqan naýqastar budan bylaı dıagnostıkalyq tekserýden ótý úshin onkologııalyq ortalyqtaǵy «PET» ortalyǵynyń qyzmetine júgine alady. Jańa tekserý ortalyǵynyń jumysyn iske asyrý úshin qala ákimi Erlan Aıtahanov túrik kompanııasymen kelissóz júrgizip, ekijaqty memorandýmǵa qol qoıdy.
Memorandým aıasynda túrik ınvestorlary qalalyq onkologııalyq ortalyqqa sońǵy úlgidegi zamanaýı pozıtrondy-emıssıondy tomografııa jáne sıklotron qondyrǵysyn ornatady. Sıklotron apparaty naýqastarǵa qajetti radıofarmpreparattardy daıyndaý maqsatynda ornatylýda. Jalpy joba quny 2,7 mlrd teńgeni quraıdy.
Bul qural-jabdyqty ornatý arqyly jylyna ortasha eseppen 10 myń adamnan onkologııalyq aýrýlardyń taralýyn erte satysynda anyqtap, ólim-jitim kórsetkishin edáýir azaıtýǵa múmkindik beredi. Aıta keteıik, túrik kompanııasynyń jobasy boıynsha memlekettik bıýdjet esebinen qosymsha qarjy bólinbeıdi. Investor óz qarajaty esebinen jabdyqtardy satyp alyp, nysandy jalǵa alý arqyly halyqqa tegin medısınalyq qyzmet kórsetedi.
Qaterli isik aýrýy erte satysynda anyqtalǵan jaǵdaıda saýyǵyp ketý múmkindigi mol bolady. Al «PET» qural jabdyǵy qaterli dert anyqtalǵan jaǵdaıda asqyndyrmaı, emdi erte bastaýǵa múmkindik beredi.
Búginge deıin dıagnostıkadan ótý úshin naýqastar 2-3 aı ýaqytqa deıin kezek kútip, Nur-Sultan, Almaty qalalaryna barýyna týra keletin. Al PET/KT qural-jabdyǵyn ornalastyrǵannan keıin dıagnostıkany qajet etetin pasıentter ózge qalaǵa sabylmaı-aq Shymkent qalasyndaǵy onkologııalyq ortalyqqa baryp, qajetti tekserýden óte alady. PET qural-jabdyǵy kúnine 30 adamǵa deıin qabyldaı alady.
Shymkent qalasyndaǵy onkologııa ortalyǵynda naýqastardyń 100 paıyzy zertteýdiń bul túrin medısınalyq kómektiń kepildengen kólemi sheńberinde tegin ótedi.
ShYMKENT