Bul jóninde oblystyq kásipkerler palatasynyń baspasóz qyzmeti habarlady.
«Maks» jaýapkershiligi shekteýli seriktestiginiń dırektory, oblystaǵy 82 jastaǵy eń qart kásipker Maksım Artemýktiń ústinen qylmystyq is qozǵalǵan bolatyn. Qart kásipker ózi turatyn Qarasý aýdandyq kiris bóliminiń túsindirýi boıynsha salyǵyn tólep otyrǵan, al oblystyq kiris basqarmasy ony 212 mıllıon teńge tólemegen dep sanaıdy.
Maksım Artemýk oblystaǵy belgili mesenat, onyń kásiporny qurylǵan kezinen bastap qaıyrymdylyq sharalarymen aınalysady. Onyń syrtynda aýyldaǵy mektepke, aýrýhanaǵa, áleýmettik az qorǵalǵan otbasylarymen bıýdjet qyzmetkerlerine kómek berýdi kásiproryn óz moınyna alǵan. 2018 jyldyń qorytyndysy boıynsha ol oblystaǵy «Jyl mesenaty» atanyp, «Jomart júrek» syılyǵymen marapattaldy.
Al bıyl Maksım Artemýktyń ózine kómek kerek boldy. Ol jıyn-terin naýqanyna kirisý úshin aldymen ekonomıkalyq tergeý departamentine óziniń kinásiz ekenin dáleldep alý kerek boldy. Ol ózin qorǵaý úshin kásipkerlerdiń oblystyq palatasyna júgindi.
«Tájirıbe kórsetip júrgendeı, oblystyq ekonomıkalyq tergeý departamenti tirkegen bıznes nysandaryna qatysty qylmystyq isterdiń tórtten biri qylmysynyń joqtyǵyna baılanysty qysqartylady. Artemýktiń ústinen qozǵalǵan iste dál solaı bolyp otyr. Qazaqstan Respýblıkasynyń QK 245-baby bul qylmystyń úsh túrli tásilmen oryn alǵanyn qaraıdy, olar: deklarasııasyn kórsetpegeni, deklarasııadaǵy málimetterdiń burmalanyp kórsetilýi jáne salyq salynatyn óz nysandaryn qysqartyp kórsetý. Myna iste kásipker olardyń bireýin de jasamaǵan, taza. Onyń taza ekenin salyq organdarynyń aktilerimen dáleldenedi»,- dedi kásipkerler quqyn qorǵaý keńesiniń kezekti otyrysynda oblystyq kásipkerlerdiń óńirlik palatasy dırektorynyń orynbasary Samat Sádýaqasov.
Kásipkerler palatasy kásipker Artemýktyń aýdandyq salyq bóliminiń túsindirý jumystary sheńberinde áreket etkenin aıtyp, ekonomıkalyq tergeý departamentine qylmystyq isti qysqartý týraly hat jazǵan bolatyn. Oǵan eshqandaı jaýap bolmaǵan soń, kásipkerler palatasynyń zańgerleri oblystyq prokýratýraǵa shaǵymdandy. Prokýratýra isti bastan aıaq teserip, kásipkerdiń eshqandaı salyq zańnamalaryn burmalamaǵanyn anyqtap, uzaqqa sozylǵan qylmystyq isti qysqartýǵa nusqaý berdi.
Oblysta tek 2018 jyly ǵana salyǵyn jasyrǵany jóninde ekonomıkalyq tergeý departamenti tirkegen 18 istiń 10-y aqtalyp, qysqartylǵan.