Prezıdent janyndaǵy Adam quqyqtary jónindegi komıssııa elorda turǵyndaryn sapaly aýyz sýmen qamtamasyz etý jáne tutynýshylar quqyqtaryn qorǵaý taqyrybyna arnalǵan keńeıtilgen otyrys ótkizdi.
Atalǵan komıssııanyń tóraǵasy Qýanysh Sultanovtyń basshylyǵymen ótken jıynda Adam quqyqtary jónindegi komıssııa músheleri, Nur-Sultan qalasy ákiminiń orynbasary Ermek Qızatov jáne «Astana sý arnasy» MKK bas dırektory Tabıǵat Zeınulqabden óz baıandamalaryn jasady. Otyrysqa zań shyǵarýshy, atqarýshy organ jáne sot ókilderi, «Astana sý arnasy» MKK-niń, halyqaralyq jáne úkimettik emes uıymdardyń ókilderi qatysty.
Komıssııa músheleri eldiń sý resýrstaryn ulttyń gendik qoryn saqtaýǵa qyzmet etetin mańyzdy strategııalyq obektiler retinde qorǵaýdyń mańyzdylyǵyn erekshe atap ótti. Elorda halqyn sapaly sýmen qamtamasyz etýdiń, tutynýshylardyń quqyqtaryn saqtaý máseleleri men olardy sheshýdiń joldary talqylandy. Otyrysqa qatysqandar óz usynystaryn bildirip, «Astana sý arnasy» MKK-niń jumysyna qatysty oılarymen bólisti.
Baıandama jasaǵandar ınfraqurylymdyq mindetterdi – jańa jáne sapaly sý alý qurylǵylaryn, sý qubyrlaryn, kommýnaldyq jeliler salý arqyly sýdyń jetkizilýin qamtamasyz etý mindetterin sheshýdiń qajettigin atap ótti.
Jıyn barysynda komıssııa músheleri men sarapshylar astana turǵyndaryn aýyz sýmen tolyq qamtamasyz etý, sondaı-aq tarıftik jospardy qaıta qaraý máselesin talqylady. «Astana sý arnasy» MKK bas dırektory Tabıǵat Zeınulqabdenniń aıtýynsha, Nur-Sultan qalasynyń aýyz sý tarıfi respýblıka boıynsha 11-orynda. Sonymen qatar uıym basshysy qazirgi kezde arnaıy bilimi bar tehnıkalyq mamandardyń jetispeýshiligi baryn aıtyp ótti.
Oǵan qosa, Komıssııa otyrysynda 16-27 qyrkúıek aralyǵynda Varshava qalasynda ótken EQYU jyl saıynǵy keńesiniń qorytyndylary talqylandy. Qýanysh Sultanov tujyrymdar men usynystar Memleket basshysynyń, Parlament pen Úkimettiń nazaryna jetkiziletinin málimdedi.