Shymkentte kásipkerler men ınvestorlarǵa qyzmet kórsetetin biryńǵaı ortalyq jumys isteıdi. «Bir tereze» qaǵıdaty boıynsha bıznesti qoldaý men damytýdyń barlyq sharalaryn qamtamasyz etetin bul ortalyq qyzmetine júginetinderdiń qatary kún ótken saıyn artyp keledi.
Qazirgi tańda front-ofıs mamandarynyń qyzmetine 5 myńǵa jýyq adam júgingen. Kásipkerlerge qyzmet kórsetý ortalyǵynyń jumysymen tanysqan qala ákimi Erlan Aıtahanov atalǵan ortalyq bıznes ókilderiniń basyn qosatyn alańǵa aınalý kerek ekenin aıtty. Sonymen qatar qala basshysy ınvestorlardy eń aldymen qalanyń ınvestısııalyq múmkindikteri qyzyqtyratynyn kóldeneń tartyp, ol qyzmetti uıymdastyrýda negizgi qadamdaryn jeńildetilgen formatta sıpattaýǵa basa nazar aýdarý qajettigine toqtaldy.
«Bızneske arnalǵan úkimet» jobasyn «SHYMKENT» ÁKK» AQ men «Atameken» kásipkerler palatasy birge júzege asyrýda. Bul jumystar bıznes múmkindikterin keńeıtý, sondaı-aq ınvestorlardy tartý maqsatynda el Úkimetiniń ınvestorlar úshin «bir tereze» front-ofısterin qurý týraly tapsyrmasynyń negizinde júzege asty.
Atalǵan úderisterdi ońtaılandyrý, kásipkerler men ınvestorlarǵa kórsetiletin memlekettik qyzmetterdi keńeıtý maqsatynda memlekettik kirister jáne kóshi-qon qyzmetteri departamenti men «Qazposhta» AQ qyzmetterin «bir tereze» arqyly biriktirý týraly sheshim qabyldandy.
Munda ınvestorlar men kásipkerlerge 9 baǵyt boıynsha qyzmet kórsetiledi. Atap aıtqanda: memlekettik qyzmetter kórsetý, jobaǵa qoldaý kórsetý, marketıngtik qyzmetter, býhgalterlik qyzmetter, memlekettik satyp alý boıynsha keńester, CT KZ sertıfıkattaryn berý, qarjy uıymdary men damý ınstıtýttarynyń qyzmetteri, bıznestiń quqyqtary men zańdy múddelerin qorǵaý boıynsha qyzmetter, kóshi-qon máseleleri men keden, salyq máseleleri.
«Bızneske arnalǵan Úkimet» naryqtaǵy ózgeristerdi, memlekettik saıasattaǵy, ekonomıkadaǵy, zańnamadaǵy ózgeristerdi eskere otyryp, sáıkesinshe, únemi jańaryp otyrady.
ShYMKENT