Baıqaý elimizde ekinshi ret ótip otyr. Qostanaıdaǵy bıylǵy maýsymǵa 8 kásipker hanym qatysty. Olardyń barlyǵy da oblys ortalyǵy men Rýdnyı, Lısakov qalalaryndaǵy túrli salada óz isin shyr aınaldyryp júrgen kásipkerler.
«Árıne, kásipker ári otbasynyń berekesi bolyp júrgen áıelderge birden sahnaǵa shyǵý ońaı emes. Sodyqtan biz birneshe kún olarmen jumys istedik, sheberlik klasyn ótkizdik. Jyl aıaǵynda Nur-Sultan qalasynda qorytyndy baıqaý bolady. Búkil óńirlik satydaǵy baıqaýlardyń jeńimpazdary qorytyndy respýblıkalyq satyda óz oblystarynyń namysyn qorǵaıtyn bolady», dedi baıqaýdy uıymdastyrýshy Sáýle Qaısar.
Baıqaýǵa qatysqan 8 bıznes-hanymdar aldyn ala daıyndaǵan beıne materıal arqyly ózderin tanystyrdy. Sodan keıin olar parasat paıymy deńgeıi boıynsha básekege tústi. Jarystyń úshinshi satysynda kórermen aldynda ónerin kórsetti. Baıqaýǵa qatysqan hanymdardyń ádemiligin bylaı qoıǵanda, barlyǵy da isker, otbasynyń uıtqysy, bala tárbıelep otyrǵan analar. Alaıda jarystyń maqsaty úzdikti anyqtaý bolǵandyqtan, qazylar alqasynyń tańdaýy rýdnyılyq Anna Nasıbýllınaǵa tústi. Kenshiler qalasyndaǵy qyzmet kórsetý salasynda kásipkerligin úıirip otyrǵan Anna baıqaýdyń barlyq sharttary boıynsha jaqsy óner kórsetti. Ol endi jyl aıaǵynda Nur-Sultan qalasynda ótetin respýblıkalyq baıqaýda baǵyn synaıdy.