Jetisý topyraǵynda qazaq ádebıetiniń dúbirli toıy bastaldy. Jyr Qulageri Ilııas Jansúgirovtyń týǵanyna 125 jyl tolýyna oraı aqynnyń kindik qany tamǵan Aqsý aýdanynda saltanatty jıyn ótti.
Jansúgirov kentinde resmı bastalǵan saltanatty sharada aqynnyń mármárdan qashalǵan eskertkishi ashyldy.
Búgin týǵan jeriniń tórinen aqynǵa arnalyp eńseli eskertkish ornatylyp otyr. Bul – eliniń tarlan talantqa degen qurmeti, eren erge degen taǵzymy dep bilemiz. Zańǵar jazýshy Muhtar Áýezov: «Qazaqtyń Abaıdan keıingi zamanyndaǵy asa daryndy aqyny Ilııas Jansúgirov. Ilııas poezııasy – oıǵa qanat, sezimge nár beretin, eshqashan eskirmeıtin máńgi jas poezııa», – dep baǵa bergen edi. Jetisý topyraǵynda týǵan qaıratker-tulǵa qazaq ádebıetiniń barlyq janryna eleýli eńbek sińirdi, – dedi jıynda sóz alǵan Almaty oblysynyń ákimi Amandyq Batalov.
Ortalyq alańǵa qoıylǵan Ilııas Jansúgirov eskertkishiniń avtory músinshi, Qazaqstan Sýretshiler Odaǵynyń múshesi, Mádenıet salasynyń úzdigi Qazbek Dýlatov.
Ilııas Jansúgirovtyń týǵanyna 125 jyl tolýyna uıymdastyrylǵan sharalar legi búgin oblys ortalyǵynda jalǵasady.
Qalmahanbet MUQAMETQALI,
«Egemen Qazaqstan»
Almaty oblysy