Sońǵy jyldary dástúrli túrde ótkizilip kele jatqan «Altyn tulpar» alaman báıgesi bıyl besinshi ret Atyraý tórinde uıymdastyrylyp, 51 shaqyrymdyq qashyqtyqqa jiberilgen 37 júırikten qyzylordalyq Berdibek Myhanovtyń «Qoıanqasqasy» mańdaıy jarqyrap dara keldi.
«Buǵan deıin tórt dúrkin elorda irgesinde dala shańyn kóterip, básiresi mol báıgeniń oljasyn sarapqa salǵan alamannyń bıyl batys óńirinde jalaýyn tigýi, ortalyqtan shalǵaı aımaqta ómir súrip jatqan atbegilerdiń de mártebesin kóterip, seıistik sheberligin shyńdaý edi» deıdi uıymdastyrýshylar.
Nur Otan partııasy, Mádenıet jáne sport mınıstrligi, Ulttyq sport qaýymdastyǵy jáne Atyraý oblysy ákimdiginiń qoldaýymen ótip, aǵaıynnyń kóz qýanyshyna aınalǵan báıgeniń bas júldesiniń ıegeri «Qoıanqasqaǵa» 10 mln teńge buıyrsa, kómbege ekinshi bolyp jetken Jambyl oblysynyń júırigi «Shymshyqqa» 5 mln, úshinshi bolyp kelgen «Dos» atty araby toryǵa 2,5 mln, tórtinshi bolyp shylbyr ustatqan mańǵystaýlyq besti júırik «Aıtóbelge»1,5 mln, besinshi bolyp máreden ótken Atyraý oblysy Mahambet aýdanynan kelgen «Jezkıik» atty qula bıeniń ıesine 1 mln teńge buıyrdy.
Alaman báıge jeńimpazdaryn Nur Otan partııasynyń hatshysy Ǵabıdolla Ospanqulov, Atyraý oblysy ákiminiń birinshi orynbasary Serik Jambyluly, Ulttyq sport qaýymdastyǵynyń Bas hatshysy Nursultan Ibragımov qatarly azamattar marapattady.