Túrkistan oblysy Arys qalasynda atqarylyp jatqan qurylys jáne jóndeý jumystary aıaqtalý satysynda tur. Degenmen, qurylys nysandary aýqymdy Nur – Sultan jáne Shymkent qalalary kestede belgilengen merzimnen keshigip keledi. Elordalyq qurylysshylar moınyna alǵan 1167 páterge kúrdeli jóndeý júrgizilse, úsh kópqabatty úıdegi 287 páter jańadan salynýda. Bul aımaqtarǵa qaraıtyn úılerdiń qurylysy men ishki jáne syrtqy árleý jumystary jalǵasýda.
Oblys ákimi О́mirzaq Shókeevtiń tóraǵalyq etýimen ótken apparat májilisiniń keńeıtilgen otyrysynda Arys qalasyndaǵy jumys jóninde baıandaǵan sektor jetekshileri osyndaı málimetter keltirdi. Kún tártibinde aldymen Arys qalasynda atqarylyp jatqan qurylys jumystary men jol, káriz júıeleriniń jańarýy jaıly sońǵy málimetter men 2020 jyldan bastap elimizde engiziletin ataýly áleýmettik kómekti tóleýdiń jańa tásilderi talqylandy. Sondaı-aq Túrkistan qalasyn kógaldandyrý men abattandyrý jumystary barysy baıandaldy. Túrkistan qalasy jasyl jelektendirý jumystary boıynsha Arys tájirıbesi negizinde 16 sektorǵa bólingen. Búginde sý uńǵymalary men qudyqtar qazylyp, zamanaýı jańa aıaldamalar ashylyp, aǵashtar otyrǵyzylyp, oryndyqtar ornatylýda, sonymen qatar jolaıaq pen velosıped jolyn salý jumystary qarqyndy júrgizilýde.
Keńeıtilgen otyrysta ataýly áleýmettik kómekti tóleýge qatysty oblys boıynsha sońǵy derekter jarııa etildi. Bul rette, tabysyn jasyrý, jeke bıznesiniń bolýy jáne AÁK alý sharttaryn buzý sekildi 18 myńnan astam derek anyqtalǵan. Jıynda buryn taǵaıyndalǵan AÁK qaıta esepteý nátıjesinde 4,2 myń otbasyǵa ataýly áleýmettik kómek berýden bas tartylǵany, 3,1 myń otbasyǵa ýaqytsha toqtatylyp, 7,3 myń otbasyǵa qaıta eseptelingeni jáne artyq tólengen 650 mln teńgeniń 38,8 mln tg qaıtarylǵany málimdeldi.