Ony oryndamaǵan jumys berýshilerge aıyppul salynady. Mundaı norma «Halyq densaýlyǵy jáne densaýlyq saqtaý júıesi týraly» kodeks jobasynyń jańa redaksııasynda qarastyrylǵan. Bul týraly Densaýlyq saqtaý mınıstrliginiń baspasóz qyzmeti jarııalady.
«Kodekste jumys berýshiniń jaýapkershiligi de qarastyrylyp otyr. Olar qyzmetkerlerine skrınıngten ótý úshin 5 kúnge deıin aqysy tólenetin demalys beredi. Barlyq azamattardyń belgili bir skrınıngten tegin ótýge múmkindikteri bar. Balalardy jyl saıyn medısınalyq tekserýden ótkizý de qarastyrylǵan. Jumys berýshi aqysy tólenetin demalys berýge mindetti. Ony oryndamaǵan jaǵdaıda jumys berýshige aıyppul salynady», - dedi Májiliste atalǵan kodeks jobasyn tanystyrǵannan keıin BAQ ókilderine suhbat bergen Densaýlyq saqtaý mınıstri Eljan Birtanov.
Osy oraıda mınıstr jumys berýshi qyzmetkerin skrınıngten ótý úshin aqysy tólenetin demalysqa jiberse qaıda shaǵymdanýǵa bolatyndyǵyn aıtty.
«Zań boıynsha osyndaı jaýapkershilik engizilgennen keıin QR Eńbek jáne halyqty áleýmettik qorǵaý mınıstrliginiń eńbek quqyqtaryn qorǵaý, Densaýlyq saqtaý mınıstrliginiń medısınalyq qyzmetterdiń sapasyn baqylaý salalaryndaǵy komıtetterine shaǵymdanýǵa bolady», - dep atap ótti mınıstr.