Ulttyq ekonomıka mınıstri Rýslan Dálenovtiń sózinshe búgin AI-92 markaly janarmaıdyń bir lıtri 150 teńgeni qurap otyr.
«Al onyń aksıziniń baǵasy - 8 teńge. Bul kórshiles memlekettermen salystyrǵanda áldeqaıda az. Jobalarymyzǵa sáıkes aksızdiń stavkasyn 10 teńgege deıin arttyrý kerek», dedi Ulttyq ekonomıka mınıstri Rýslan Dálenov
Joba 1 jeltoqsanda talqylaýǵa usynylady. Odan soń 1 jarym aıdan keıin sheshim qabyldanady.
Osyǵan deıin Energetıka mınıstri Qanat Bozymbaev kórshi eldiń júrgizýshileri arzan benzındi kóbirek alyp ketý úshin janarmaı quıý beketterine qosymsha ydyspen keletinin aıtqan bolatyn. Ol elden keletin júk tasymaldaıtyn tranzıttik mashınalar tipti 3-4 tonnalyq qosymsha baktarmen jabdyqtalatyn kórinedi.
Sarapshylar úkimettiń resmı málimetine deıin-aq benzın baǵasynyń kúzge qaraı qymbattaıtynyn aıtyp qoıǵan. Olardyń túsindirýinshe, suıyq otyn baǵasyn ósirýge birneshe sebep bar. Qazaqstandaǵy úsh birdeı munaı óńdeý zaýyty qaryz aqshaǵa jańartylyp jatyr.
Onyń shyǵynyn jabý qarapaıym kólik júrgizýshileriniń esebinen júrgizilýi bek múmkin.
Janarmaı baǵasynyń sát saıyn qymbattaýy qoǵam úshin úırenshikti jaıt bolyp ketti Otandyq sarapshylar janarmaı baǵasy aldaǵy ýaqytta da qymbattaı beretinin aıtyp otyr.
Eldegi baǵaǵa áser etetin faktor kóktemgi jáne kúzgi egistik naýqanymen ǵana shektelip otyrǵan joq.
Qazaqstandyq sarapshy Erlan Ibragım 2025 jyly Eýrazııalyq ekonomıkalyq odaqtyń biryńǵaı naryǵy qalyptasýy tıis ekenin aıtady. Sol sebepti , janarmaı men basqa da taýarlar baǵasy barshaǵa ortaq bolýy kerek.
«Bizdegi janarmaı qunynyń Reseı naryǵynyń baǵamyna jaqyndap kele jatqany sodan», deıdi ekonomıkalyq sarapshy Erlan Ibragım.
Úkimet qolda bar benzındi saqtap qalý úshin shekara arqyly avtokólikpen alyp ótýge shekteý qoıatyn jańa buıryq ázirlep jatyr. Buıryqqa sáıkes, otyndy tek zaýyttyq benzın baktarymen tasymaldaýǵa ǵana ruqsat beriledi jáne qosymsha tek 20 lıtrlik kanıstra alýǵa bolady.
Qazir naryqta janarmaı qory jetkilikti. Úkimet qosymsha Reseıden qajetti benzındi satyp alǵan. Biraq baǵasy qymbat.
Buǵan deıin Energetıka mınıstri qazannyń sońynda janarmaıdyń ortasha quny 160-161 teńge bolady dep edi. Búgin bizdi odan da joǵary baǵa kútip turǵany belgili boldy.
Sheneýnikterdiń boljamyna sensek, janarmaı tek qarashanyń ortasynda azdap arzandaýy múmkin. Bir aıdan keıin elimizdegi munaı óńdeıtin úsh zaýyt ta iske qosylyp, otandyq benzınniń kólemi artady eken.
Búshin Astana men Almatyda AI-92 markaly benzın 157 teńgeden satylýda. Esterińizge sala keteıik, qazirgi ýaqytta qazaqstandyq benzınge salynatyn aksız kólemin eki jarym esege arttyrý jóninde qujat ázirlenip jatyr.
Almaty