Bizdiń keıipkerimizdiń aty-jóni – Indıra Qalqabaeva. Ol Almaty qalasyndaǵy №12 emhananyń dárigeri, Nur Otan partııasynyń múshesi. Bul oqıǵa «Jezqazǵan – Almaty» poıyzynda bolǵan edi. Tús mezgilinde kýpege jolserik júgirip kirip «jolaýshylardyń ishinde medbıke nemese dáriger bar ma?» dep sasqalaqtap surady. Kórshi vagondaǵy aıaǵy aýyr áıeldiń háli nasharlap, shuǵyl dárigerlik kómek kerek bolyp tur eken. Onyń ótinishi Indırany beıjaı qaldyrmaı, kómek qolyn sozdy. Aıaǵy aýyr áıeldiń janyna kelip, aty-jóni men júktilik merzimin, bir sózben aıtqanda, dáriger-gınekologtar bilýge tıis málimetterdiń bárin táptishtep surap aldy.
Alǵashqyda qatty sasyp qaldym. Biraq birden esimdi jıyp alyp, tolǵaq qysqan aralyqtaǵy ótken ýaqytty sanaı bastadym. Tolǵaqtyń jıileı túskenin baıqaǵannan keıin, arqasyn ýqalap, terezeni ashyp, bosanatyn áıelge jaıly jaǵdaı jasaý úshin qolymnan kelgennin bárin istep baqtym. Jolserikten taza jaıma, súlgi, spırt, dári qobdıshasy sııaqty kerektiń bárin surap aldym», deıdi Indıra.
«Bári de kınodaǵydaı boldy. Bosanyp jatqan áıeldiń janynda otyrmyn. Maǵan qoldan jasalǵan, shaǵyn pyshaqty, bir shólmek sý men ishinde dáke, sýteginiń asqyn totyǵy men birneshe dári-dármek salynǵan qobdıshany alyp keldi. Birneshe mınýttan keıin áıeldiń bosanýǵa jaqyn qalǵanyn túsindim», deıdi bizdiń keıipkerimiz.
Dúnıege kelgen perzentti «Qazaqstan temir joly» degen jazýy bar jaımaǵa orady. Pyshaqty ystyq sýǵa malyp alyp Indıra sábıdiń kindigin kesip, sheshesiniń keýdesine jatqyzdy. Shamalǵanda olardy jedel járdem kútip aldy. Anar men balany perzenthanaǵa alyp ketip, olardy ajaldan aman alyp qalǵan áıel otbasymen ári qaraı Almatyǵa jol júrip ketti.
«Vagonyma jetkenge deıin halyq dý qol shapalaqtaýmen boldy, al meniń qolym dirildep, abyrjýym basylmaı qoıdy. Qudaıǵa shúkir, bári de jaqsy aıaqtaldy. Dúnıege kelgen qyzdyń atyn Kózaıym qoıypty. Qazir olar Aqtaýda turady. Hat jazysyp turamyz, olar maǵan fotosýretterin de jiberdi. Jolym bolyp, oqıǵanyń sátti aıaqtalǵanyna qýanyshtymyn. Bul oqıǵadan keıin men dárigerliktiń tek tájirıbe men oı jumysy ǵana emes, adamdarǵa baqyt syılaýdyń mol múmkindigi ekenin túsindim», deıdi Indıra.f