Elordanyń «Barys» hokkeı klýby Qurlyqtyq hokkeı lıgasy (QHL) aıasyndaǵy kezekti týr oıynyn «Barys Arenada» Rıganyń (Latvııa) «Dınamo» komandasyna qarsy ótkizip, ekinshi oıyn qatarynan overtaımda jeńiliske ushyrady.
«Barys» pen «Dınamo» arasyndaǵy oıyn asa tartysty ótti. Kezdesýdi tamashalaýǵa kelgen 5 myńǵa jýyq jankúıer úsh kezeńge sozylǵan básekede 7 goldyń kýási boldy. Matchtyń birinshi kezeńinde hokkeıshiler bir-biriniń qaqpasyna shaıba soǵa almady. Ekinshi kezeńniń 25-mınýtynda Rıhards Marenıs mergendigimen kózge túsip, qonaqtardy esepte alǵa shyǵardy. Arada 6 mınýt ótkende «Barys» sapynan Álıhan Ásetov esepti teńestirip ketti. Kezeń aıaqtalar tusta Laýrıs Darzınsh tablodaǵy kórsetkishti 1:2-ge jetkizdi.
Úshinshi kezeńde jerlesterimiz qarsylas komandanyń qaqpasyna eki shaıba soǵýǵa múmkindik aldy. 41-mınýtta Roman Starchenko qaqpany dál kózdese, 54-mınýtta Álıhan Ásetov dýbl avtory atandy. Qonaqtar sapynan Karter Eshton bir golmen jaýap qatyp, esepti 3:3-ke jetkizdi. Osylaısha oıynnyń negizgi kezeńi teń eseppen aıaqtaldy. Al qosymsha ýaqyttyń úshinshi mınýtynda Krıstaps Sotnıekstiń soqqan shaıbasynyń arqasynda «Dınamo» jeńiske jetti. Jerlesterimiz kelesi kezdesýin jeksenbi kúni Máskeý oblysynyń «Vıtıaz» komandasyna qarsy ótkizedi.