Bul mańda túbi bir túrkiniń túpki qarashańyraǵynda kenje uldaı bolyp otyrǵan qazaq halqynyń tarıhy myńjyldyqtardan syr shertedi. Zaısan men Kúrshimnen tas dáýirinde ómir súrgen adamdardyń turaqtary men jádigerleri tabylsa, Bóritostaǵandaǵy qyzyl qynamen jazylǵan tańbalar adamzat balasy jylqyny alǵash qolǵa úıretip, qymyz sapyra bastaǵan dáýirden jetken sýretter...
Tarıhqa toly Tarbaǵataı óńiriniń asqaq Altaımen japsarlas jatqan baı murasy haqynda jaryq kórgen kitaptyń tórtinshi tomy Qazaqstan Jazýshylar odaǵynyń tóraǵasy Ulyqbek Esdáýlettiń osyndaı kirispe sózimen ashylypty. Kúni búginge deıin tórt tomy jaryq kórgen «Tarıhqa toly Tarbaǵataı» almanaǵynyń shyǵarýshysy Tas Group kompanııalar tobynyń negizin qalaǵan, TasCredit qarjy kompanııasynyń basshysy, Assyltas qoǵamdyq qorynyń prezıdenti Dýlat Tastekeev. Maqsatyn «Tarbaǵataıdyń qatparly tarıhyna úńilý, ár jýsanynan, esken jelinen, aqqan sýynan syr ańdaý jáne de óńirdiń jumbaǵyn ashý, urpaǵyna óz ólkesiniń kıesin, qasıetin uǵyndyrý» degen pikirimen aıshyqtap, osy jobanyń úlgisimen árbir ólkeniń belsendi azamattary týǵan óńiri jaıly qyzyqty jazbalalar beretin paraqsha ashsa, sóıtip Qazaqstannyń búkil aýmaǵynda ólketaný ǵylymy jandanyp, ekotýrızm damysa» degen oıyn turaqty nazarda ustap keletin isker azamat bul joly da týǵan jerdiń tereńdegi tarıhyna úńilip, el tarıhyna degen qurmetin mazmuny tereń kitapqa syıǵyzǵandaı...
Jeti bólimnen turatyn kitapta tarıhy Tarǵytaı babasymen baılanystyrylatyn kıeli mekenniń sarqylmaıtyn san alýan baılyǵy pash etiledi. Arheolog Erden Oralbaı qurastyrǵan tarıhı tom kóne zaman eskertkishteri, arheologııalyq zertteýler barysy, ǵalymdardyń zertteý maqalalary, óńirdiń isker azamattary týraly málimettermen tolyqqan. Al óńirde áli de syry men jumbaǵy ashylmaǵan eskertkishter barshylyq. Tarbaǵataıdyń kúngeıi men teriskeıi, Joǵary Ertis óńiriniń HH ǵasyr basyna deıingi jekelegen tarıhyna qatysty tyń maǵlumattar áli tolyǵymen jarııa etilgen joq.
Týǵan ólkesin dáripteýdi ár kez nazarda ustap júretin ultjandy azamat bul joly Aqsýat aýylynda úsh márte ótken aqyndar aıtysynyń tolyq mátinin «Týǵan jerge týyńdy tik» kitabyna toptastyryp shyǵarýdy da maqsat etipti. Aqsýat aıtysynyń asyl arnasy jaıynda sóz etken aqyn, Qazaqstannyń eńbek sińirgen qaıratkeri Júrsin Erman «Osydan úsh jyl buryn qanatyn qaqqan bul joba kelesi jyly-aq halyqaralyq mártebege ıe boldy. Jyl saıyn shilde aıynyń sońynda Qazaqstannyń ár aýmaǵynan aıtýly aqyndar Aqsýatqa at basyn burady. Jyr jármeńkesinde aqyndar Aqsýat aımaǵynyń arǵy-bergi tarıhyn telegeı jyrǵa aınaldyryp, tereńnen oı qozǵaıdy. Soǵan laıyq osy óńirdi mekendegen Muryn ananyń urpaqtarynyń búgingi qajyrly eńbegi, qaıratty qımyly aýyz toltyryp aıtýǵa molynan jetedi» degen júrejardy joldarynan kitaptyń mazmunyna tereńdeı túsesiz. Jyr-shýmaqtardy shashaý shyǵarmaı jınaqtaǵan aqyn Serik Qalıev. Aqyndardyń jyr-shýmaǵyna arqaý bolǵan jer-sý attary men aımaqqa áıgili tulǵalar týraly málimetter de kitaptyń ajaryn ashyp, mazmunyn baıyta túsedi. Sondaı-aq shyraıly shýmaqtardyń ıesi aqyndardyń ómirdereginen de qysqasha málimetter berilgen.
Kitaptyń tanystyrylymyna qazaqtan shyqqan tuńǵysh Olımpıada chempıony Á.Jarmuhamedov, aqyn J.Erman, Qazaqstan Jazýshylar odaǵynyń tóraǵasy U.Esdáýlet, ulaǵatty ustaz O.Qarabalına qatysty.
ALMATY