Búginde Jambyl oblysy turǵyndarynyń turmystyq tabysyn jaqsartý jobasy jalpy óńir halqynyń arasynda keń qoldaýǵa ıe bolyp otyr. Pılottyq jobaǵa engen on aýyldyq okrýgten bólek, basqa da eldimekenderdiń turǵyndary ıgi bastamaǵa qyzyǵýshylyq tanytýda. Kóptiń kókeıindegi saýaldarǵa jaýap berý úshin Jambyl oblysynyń ákimi, Nur Otan partııasy oblystyq fılıalynyń tóraǵasy Asqar Myrzahmetov Baızaq aýdanynda qoǵamdyq qabyldaý ótkizip, turǵyndarmen kezdesti.
Kezdesýge aýdannyń bes turǵyny kelip, tolǵandyryp júrgen ózekti saýaldaryn joldady. Aıtalyq, Túımekent jáne Qyzyl Juldyz aýyldyq okrýginiń turǵyndary Jomart Muhambetjanov pen Asylbek О́mirzaqov óz okrýgteriniń jobaǵa qashan enetinin surap, aýyldastary da joba aıasynda turmysyn tikteýge asyq ekenin jetkizdi. Túımekenttik Jomart Muhambetjanov aýyldastarynyń mal sharýashylyǵyna beıim ekenin, úı irgesindegi jerlerdi tıimdi ıgerip, eki aınalymda da ónim alýǵa daıyn ekendigin aıtyp, tek qoldaý bolsa degen nıetin bildirdi. Al, qyzyljuldyzdyq Jomart Muhambetjanov óz okrýginde kooperatıv quryp, tıisti jumystardy bastap ketkenin aıtty. Asqar Myrzahmetov jobanyń búginde pılottyq rejımi júzege asyp jatqanyn aıtyp, tıisti qarajat qarasha aıynyń basynda túsetinin jetkizdi. Eger on aýyldyq okrýgtegi pılottyq joba óz nátıjesin berse, keler jyly óńirdegi barlyq aýyldyq okrýg túgeldeı qamtylatynyn málimdedi.
Qoǵamdyq qabyldaý kezinde ózge de azamattar túrli áleýmettik máselelerdi kóterdi. Sarykemer aýylynyń turǵyny, zeınetker Qydyráli Oralov turǵyn úı salý úshin jer kezeginde turǵandardyń ótinishin jetkizip, jer telimderin berý máselesin sheship berýdi surady. Aıta keteıik, aýyldyń Bas josparyna sáıkes eldi meken shegin keńeıtý maqsatynda 217,33 gektar jer telimi engizilgen. Ákim ol jerdiń qunynyń tym qymbat ekendigine kóńil bólip, ońtaılandyrý kerektigin aıtty. Sondaı-aq ol jerdiń sýarmaly alqap ekenin eskerý qajettigin jetkizip, Baızaq aýdanynyń halyq tyǵyzdyǵyna nazar aýdardy. Alaıda jer telimderin ózge aýdandardyń bos aýmaqtarynan berýdiń mańyzdylyǵyna toqtaldy. Qabyldaýda baızaqtyqtar turǵyndar úshin másele bolyp kele jatqan aýyz sý, gaz tartý máselelerin de kóterdi.