Premer-Mınıstrdiń orynbasary Berdibek Saparbaev bastaǵan úkimettik jumys toby Shymkent qalasyna bardy. Onyń quramynda Eńbek jáne halyqty áleýmettik qorǵaý mınıstri Birjan Nurymbetov, Densaýlyq saqtaý mınıstri Eljan Birtanov, Bilim jáne ǵylym mınıstri Ashat Aımaǵambetov, Mádenıet jáne sport vıse-mınıstri О́rken Bısaqaev, Aqparat jáne qoǵamdyq damý vıse-mınıstri Danııar Esın boldy. Bul týraly primeminister.kz habarlady.
Sapardyń negizgi maqsaty — Memleket basshysynyń Qazaqstan halqyna arnaǵan Joldaýynyń basym baǵyttaryn túsindirý.
Úkimet músheleriniń jumys sapary №65 orta mektepke barýdan bastaldy, onda pedagogtar qaýymdastyǵymen, ardagerlermen jáne bilim berý salasynyń qyzmetkerlerimen kezdesý ótti.
Kezdesý barysynda bilim berý sapasyn arttyrý, materıaldyq-tehnıkalyq bazany jaqsartý, pedagogtardyń mártebesin jáne materıaldyq qamtamasyz etýdi arttyrý jáne basqa da ózekti máseleler talqylandy.
О́z sózinde vıse-premer el basshylyǵy áleýmettik salany damytýǵa eleýli qoldaý kórsetip jatqanyn atap ótti. «Biz bilimdi jastar býynyn tárbıeleýimiz kerek. Elbasy men Memleket basshysy buǵan erekshe kóńil bóledi. "Pedagog mártebesi týraly" zań jobasy Parlamenttiń qaraýynda. Muǵalimderdiń quqyqtary qorǵalady», — dedi ol.
Vıse-premer jastardy rýhanı-ónegelik tárbıeleýdi kúsheıtýdiń, olardy mektepten tys ispen shuǵyldanýǵa tartýdyń qajettiligine toqtaldy. «Bizde jastar arasynda quqyq buzýshylyqtar men ózine-ózi qol jumsaý faktileri nelikten artyp keledi? Sebebi, balalar mektepten keıin esh nársemen shuǵyldanbaıdy. Ata-analary jumysta bolǵan kezde, bala óz betimen qalady. Balalar túrli úıirmeler men seksııalarǵa baryp, sportpen shuǵyldanyp, ónermen aınalysýy qajet. Bizde áleýmettik nysandar jetkilikti túrde salynǵan, olarǵa keshki ýaqytta ári demalys kúnderi jastardyń barýyn barynsha qamtamasyz etý qajet. Biz tıisti jumystardy júrgizip jatyrmyz. Sonda bizdiń balalarymyz tárbıeli, denderi saý bolyp, quqyq buzýshylyqtarǵa barmaıdy», — dedi B. Saparbaev.
Sondaı-aq vıse-premer kolledjderdiń jumysyn synǵa aldy. «Kolledjderde jyl saıyn myńdaǵan túlekter shyǵady, olar josparly túrde jumyssyzdar qataryn tolyqtyrady deýge bolady. Sebebi, kolledjderdiń basshylyǵy kimdi ári qalaı oqytyp jatqandaryn qadaǵalamaıdy. Birneshe jyl buryn biz ár túlektiń jumysqa ornalasýy zeınetaqy jarnalary týraly anyqtamamen rastalatyn tájirıbeni engizdik, biraq budan da shyǵýdyń jolyn tapty. Bir-eki aıǵa jumysqa turady, aýdarymdar túsken soń, qaǵaz alyp keldi jáne sonymen máseleni jaýyp qoıady. Sebebi, kolledjder suranysy joq mamandyqtarǵa oqytady jáne bilim berý sapasy tómen. Sondyqtan bizde barlyq jerde kadr tapshylyǵy bar», — dedi B. Saparbaev.
Budan ózge, vıse-premer Shymkent ákimdiginde áleýmettik-eńbek salasy máseleleri jáne mindetti áleýmettik medısınalyq saqtandyrýdy engizý boıynsha keńes ótkizdi.