Premer-Mınıstrdiń orynbasary B.Saparbaev bastaǵan úkimettik jumys toby Shıeli, Jańaqorǵan aýdandarynyń turǵyndarymen kezdesip, Prezıdent Q.Toqaevtyń Qazaqstan halqyna Joldaýynyń basty baǵyttaryn túsindirdi.
Atap aıtqanda, Eńbek jáne halyqty áleýmettik qorǵaý mınıstri Birjan Nurymbetov kelesi jyldyń 1 qańtarynan bastap eńgiziletin kópbalaly jáne muqtaj otbasylarǵa arnalǵan kómektiń jańa ádisi turaly aıtty.
«Memlekettiń negizgi qaǵıdaty - shyn máninde kómekke muqtaj adamdarǵa, birinshi kezekte balalar men kópbalaly otbasylarǵa kómek kórsetetin bolady! Eńbekke qabiletti azamattar jumys isteýge tıis, memleket jumysqa ornalasýǵa nemese shaǵyn bıznespen aınalysýǵa kómektesedi. Memlekettik kómek kópbalaly otbasylardy qoldaýdy, az qamtylǵan otbasylarǵa ataýly áleýmettik kómekti, az qamtylǵan otbasylardyń balalaryna arnalǵan kepildi áleýmettik paketti qamtıtyn bolady», - dedi B.Nurymbetov.
Mınıstrdiń aıtýynsha, kóp balaly otbasylardy qoldaý respýblıkalyq bıýdjet qarajatynan memlekettik járdemaqyny engizý esebinen qamtamasyz etiledi. Atalmysh memlekettik járdemaqy januıanyń tabysyna qaramastan barlyq kópbalaly otbasylarǵa tólenetin bolady. Memlekettik járdemaqynyń mólsheri balalardyń sanyna baılanysty saralanyp, ár balaǵa orta eseppen 10-11 myń teńgeden beriledi. Al, AÁK az qamtylǵan otbasylarǵa, sonyń ishinde kóp balaly otbasylarǵa da tólenetin bolady.
Mınıstr AÁK alatyn eńbekke qabiletti otbasy músheleri jumys isteýi tıis ekenin atap ótti. Olardy jumysqa ornalastyrý úshin ónimdi jumyspen qamtýdy jáne jappaı kásipkerlikti damytýǵa baǵyttalǵan «Eńbek» Memlekettik baǵdarlamasynyń barlyq tetikteri paıdalanylatyn bolady. Eger otbasynyń eńbekke jaramdy múshesi usynylǵan jumystan jáne jumyspen qamtýǵa járdemdesý sharalarynan bas tartsa, onda AÁK tólemi barlyq otbasy músheleri úshin toqtatylady.
Mınıstrdiń baıandamasyn muqııat tyńdap, aýyl turǵyndary memlekettik áleýmettik kómektiń jańa tetikterin maquldady.
Aýdan turǵyndary zeınetkerlik jáne turǵyn úımen qamtamasyz etý, muqtaj otbasylarǵa áleýmettik kómek kórsetý, jumysqa ornalastyrý, memlekettik qoldaý sharalaryn kórsetý jáne basqa da máselelerdi sheshýge qatysty ózderin qyzyqtyrǵan suraqtardy qoıýǵa múmkindik aldy.
«Memleket óziniń barlyq áleýmettik mindettemelerin tolyq kólemde oryndap otyr. Áleýmettik salaǵa respýblıkalyq bıýdjettiń 45% baǵyttaldy. Memleket basshysy halyqtyń ómir súrý deńgeıin jaqsartýǵa erekshe kóńil bóledi, jalaqy, zeınetaqy men járdemaqy ósýde, júzdegen nysan – mektepter, aýrýhanalar, áleýmettik turǵyn úıler salynyp, joldar jóndelýde. Aǵymdaǵy jyldyń 9 aıynynń ózinde AÁK tóleýge 200 mlrd. teńgeden astam qarjy jumsaldy», - dedi B.Saparbaev.
Sonymen qatar, vıse-premer jastarǵa rýhanı-adamgershilik tárbıe men bilim berý jáne densaýlyq saqtaý salasynyń sapasyn arttyrý, MÁMS engizý, sandyq tehnologııalardy damytý, jumyspen qamtýdy qamtamasyz etý jáne áleýmettik salany damytýdyń basqa da máselelerin qozǵady.
Sondaı-aq, úkimettik top Shıeli aýdanyndaǵy jańa aýdandyq aýrýhananyń jumysymen tanysty. Nysan 2019 jyldyń jeltoqsanynda paıdalanýǵa beriledi. Kelesi nysan-Shıeli Gejýba sement zaýyty. Kásiporynnyń qurylysy 2018 jyldyń jeltoqsanynda aıaqtalyp, 2019 jyldyń mamyr aıynda paıdalanýǵa berildi. Jobanyń quny-64 mlrd teńge. Ortalyq Azııanyń zamanaýı tehnologııalarymen jabdyqtalǵan zaýyt jylyna 1 mln tonna ónim shyǵarýǵa qýatty.