Memleket basshysy Qasym-Jomart Toqaev Máskeýde qaza bolǵan qazaqstandyq stýdent boıjetken Tomırıs Baısafanyń anasymen sóılesti. Bul týraly qyzdyń anasy Janna Ahmetova Instagram-daǵy paraqshasynda jazdy
«Prezıdent myrza, meniń qaıǵyma ortaqtasqanyńyz úshin alǵysymdy bildiremin. Meni qabyldap, istiń aq-qarasyn aıyrý jónindegi tapsyrma bergenińiz úshin, adamgershiligińiz úshin rahmet», delingen jazbada.
Sondaı-aq ol tergeý isi qalaı júrip jatqanyn jazǵan.
«Men qajetti saraptamalardyń daıyn emestigi jóninde, kýágerlerdiń, vıdeolardyń, aıǵaq zattardyń joǵalyp jatqany jóninde jáne kýágerlerdiń jaýaptary ózgerip ketip jatqany jóninde barlyq satyǵa aryz jazyp jatyrmyn. Prezıdent Qasym-Jomart Toqaev myrza qol ushyn bergennen keıin iske erekshe dáreje berilip, ekpin aldy. Ol Reseıdiń Tergeý komıtetiniń Bas tergeý basqarmasyna tapsyryldy. Tergeý toby quryldy, jańa tergeýshi taǵaıyndaldy. Is bizdiń barlyq eskertpelerimiz ben usynystarymyzdy eskere otyryp ádil tergeledi. Bul tergeý isi qalaı júrip jatyr degenge jaýap», dep jazdy Janna Ahmetova.
Eske sala keteıik, 13 sáýir kúni Máskeý memlekettik halyqaralyq qatynastar ınstıtýty (MMHQI) Halyqaralyq ekonomıkalyq qatynas fakýltetiniń 4-kýrsynda oqıtyn Tomırıs Baısafa oqý korpýsynyń 4-etajynan qulap ketken bolatyn. Ol 3 mamyr kúni Sklıfosovskı atyndaǵy ǵylymı-zertteý ınstıtýtynda kóz jumdy.