Premer-Mınıstrdiń orynbasary Berdibek Saparbaev bastaǵan úkimettik jumys toby Shymkent qalasynyń turǵyndarymen kezdesti.
Kezdesýge qala ákimi Erlan Aıtahanov, Densaýlyq saqtaý mınıstri Eljan Birtanov, Bilim jáne ǵylym mınıstri Ashat Aımaǵambetov, Eńbek jáne halyqty áleýmettik qorǵaý mınıstri Birjan Nurymbetov, Mádenıet jáne sport vıse-mınıstri О́rken Bısaqaev, Aqparat jáne qoǵamdyq damý vıse-mınıstri Danııar Esın qatysty.
Vıse-premer el basshylyǵy memlekettiń áleýmettik mindettemelerin oryndaýǵa jáne áleýmettik salany damytýǵa erekshe nazar aýdaratynyn atap ótti. Buǵan respýblıkalyq bıýdjettiń 45%-ǵa jýyǵynyń áleýmettik salaǵa baǵyttalǵany dálel. Alaıda, qoldaý masyldyq pıǵyldyń órshýine soqtyrmaýy kerek. Memlekettik kómek tek muqtaj azamattarǵa kórsetilýi kerek. Osyǵan baılanysty Úkimet zańnamaǵa tıisti ózgerister engizýdi josparlap otyr.
Berdibek Saparbaev áleýmettik qorǵaý, daryndy balalardy qoldaý, jumyspen qamtý, mádenıet pen sportty damytý týraly aıtty.
Shymkenttikter vıse-premer men mınıstrlerge óz suraqtaryn qoıyp, qalaýlary men usynystaryn jetkizdi. Atap aıtsaq, jemqorlyqpen kúresti kúsheıtý, bilim berý sapasyn arttyrý, halyqtyń áleýmettik álsiz toptaryn qoldaý, áleýmettik qamsyzdandyrý jáne basqa da máseleler qozǵaldy. Barlyq suraqtarǵa jaýap berildi. Qosymsha pysyqtaýdy qajet etetin máseleler boıynsha vıse-premer zańnamaǵa sáıkes múmkindiginshe qysqa ýaqyt ishinde jaýap berýdi tapsyrdy.
Megapolıstiń jas belsendilerimen, ǵalymdarymen, kásipkerlerimen jáne sportshylarymen kezdesý kezinde B. Saparbaev jastardyń suraqtaryna jaýap berdi.
Stýdentter bilim berý, sportty damytý, jastardy qoldaý jónindegi memlekettik saıasatty iske asyrý máselelerine qyzyǵýshylyq tanytty.
«Básekelestik barlyq jerde bolýy kerek, ásirese stýdentter arasynda. 2019 jyl ‒ Jastar jyly. Bul birtindep Eriktiler jylyna aınalady. Men óńirlerge jıi baramyn, jastarmen kezdesemin. Kóptegen órshil jáne maqsatty adamdardy kóremin. Sizderde barlyq múmkindik bar. Eń bastysy, jaqsy bilim alý múmkindigi bar. Endi JOO-lardyń reıtıngi túlekterdi jumysqa ornalastyrý jáne olardyń naryqtaǵy suranysy boıynsha jasalady», dep atap ótti B. Saparbaev.
Kezdesý aıasynda Aqparat jáne qoǵamdyq damý vıse-mınıstri Danııar Esın jastar saıasatyn júzege asyrý týraly aıtty. Onyń aıtýynsha, elimizdiń barlyq aımaqtarynda kómek kórsetýge baǵyttalǵan 200-den astam resýrstyq ortalyq, sondaı-aq jastar saıasaty salasynda 500-den astam úkimettik emes uıym bar. Sonymen qatar jas urpaqty yntalandyrýǵa jáne qoldaýǵa baǵyttalǵan, Jastar jyly aıasynda qabyldanǵan Jol kartasy sátti júzege asyrylýda.
«Jol kartasy 5 negizgi baǵyttan turady. Bul jumys isteıtin jastardy turǵyn úımen qamtamasyz etý, jastardy jumyspen qamtý, bilim berý men volonterlikti damytý, jastardyń áleýmettik belsendiligin damytý, jas otbasylardy qoldaýǵa, densaýlyqty nyǵaıtýǵa jáne áleýmettik ınklıýzıvtilikti qoldaýǵa baǵyttalǵan sharalar kesheni. Máselen, Shymkentte jýyrda jumys isteıtin jastarǵa jaldamaly baspana berý máselesi bastalady. 900 páter berý josparda bar», dedi Danııar Esın.
О́z kezeginde, vıse-premer jastarǵa masyldyq kóńil kúıdi joıýǵa jáne jańa sıfrly tehnologııalardy ıgerýge, bilim men eńbekqorlyqqa umtylýǵa keńes berdi.
«Jastarǵa memlekettik granttar bólinýde. Qazir jumys isteıtin jáne damıtyn ýaqyt. Onyń ústine memleket teńdessiz múmkindikter jasap jatyr. Jyl saıyn úsh megapolıstiń jas mamandaryna myńdaǵan jaldamaly páter berilip, jańa jumys oryndary ashylady», dedi Premer-Mınıstrdiń orynbasary.
M.Áýezov atyndaǵy OQMÝ magıstranty Sáken Saǵyndym jastar máslıhattarynyń damý perspektıvalary týraly surady.
«Bılikke jastardy kóbirek tartýymyz kerek. Muny eń aldymen, jergilikti atqarýshy organdar qolǵa alýy kerek. Mundaı máslıhattar keıbir qalalarda, sonyń ishinde Shymkentte de qurylǵan. Olardyń jumysy tek kúsheıe túsedi. Qazir memlekettik qyzmette jas, bilimdi adamdar az emes, bul qýantarlyq jaǵdaı», dedi vıse-premer.
Kezdesýge qatysýshylar jas kásipkerlerdi, olardyń startaptary men bastamalaryn qoldaý týraly usynystaryn jetkizdi. Solardyń biri – vorkaýt-qozǵalysyn damytý. Qazir Shymkentte osyndaı jeti sport alańy bar.
Sonymen qatar Berdibek Saparbaev azamattardy jeke máseleleri boıynsha qabyldap, qala ardagerlerimen kezdesti.