Almatydaǵy Kóktóbege qyzǵaldaqtar men alma kóshetteri otyrǵyzylyp, bul sharaǵa qala ákimi Baqytjan Saǵyntaev ta qatysqan edi.
Kógaldandyrý aksııasyna 500-ge jýyq adam qatyssa, onyń 200-ge jýyǵy stýdentter boldy. Barlyǵy 40 myń túp «Sıvers» alma aǵashy men «Qazaqstan», «Nursultan Nazarbaev» suryptaryndaǵy qyzǵaldaqtardyń 500 myń danasy otyrǵyzylǵan edi.
Osy aqparatty kózi shalǵan ǵalymdar joǵarydaǵy alma men qyzǵaldaqtyń surypy Kóktóbe bókterinde tamyr jaımaıtynyn, munyń basy artyq shyǵyn ekenin aıtqan. Olardyń túsindirýi boıynsha «Sıvers» surypty alma kósheti tek taý bókterinde, teńiz deńgeıinen 900 metr bıiktiktegi beldeýde ǵana ósedi.
«Sıvers» kóshetiniń árqaısysy keminde 3-5 myń, «Nazarbaev» qyzǵaldaǵynyń kósheti 200-500 teńgeniń aınalasynda. Tamyry tas jaryp shyqpaǵan «Sıvers» jabaıy almalardyń qataryn tolyqtyrady degen-di ǵalymdar.
Jýyrda áleýmettik jelilerde Kóktóbede qýraı bastaǵan kóshetterdiń sýretteri jarııalandy. Kógaldandyrý aksııasyna qatysqandar kóshetterdi túgel ekpeı, mańaıǵa shashyp ketkeni belgili boldy. Tipti qaıbiri sellofan qaptardan shyǵarylmaǵan da. Bir qapta 100 túp kóshet bar. Ekologtar bul jerde júzdegen kóshet egilmeı qalǵanyn aıtyp otyr. Tipti qatysýshylar jumys quraldary – kúrekterdi ózderimen alyp ketýdi esten shyǵarǵan.
Keıin belgili bolǵandaı, senbilikke qatysqandar otyrǵyzylýy tıis alma kóshetteri men gúl tuqymdaryn jarym-jartylaı kómip ketken. Bul derekti «Tabıǵatty qoldaý» ekologııalyq qoǵamynyń belsendileri anyqtady. Osy oqıǵaǵa qatysty Almaty qalasy ákimdiginde ishki tekserýler bastaldy. Bul týraly qala ákiminiń birinshi orynbasary Erlan Qojaǵapanov aıtty. «Tabıǵatty qutqarý» jobasynyń jetekshisi Svetlana Spatarǵa alǵysymyzdy bildiremiz. Ákimdik deńgeıinde júrgizilgen tekserýler barysynda senbilik bolǵan kezde qýraǵan kóshetter tabylǵan aýmaqqa jaýapty qyzmetker jazalandy», deıdi Erlan Qojaǵapanov.
Almaty qalasy ákimdiginiń baspasóz bólimi bul máselege qala ákimi Baqytjan Saǵyntaevtyń ózi aralasýǵa týra kelgenin aıtty. Almaty ákimdigi «Jasyl» ekonomıka basqarmasynyń jetekshisi Erlan Seıtenovke, osy basqarmanyń bólim basshysy Oljas Janysbaevtarǵa qatań sógis berildi. Almaty ákimdiginiń habarlaýynsha, Kóktóbe eteginen tabylǵan, qýrap qalǵan aǵashtardy almanyń túrli suryptaryn daıyndaıtyn mekeme kútimge alypty. Qýramaı aman qalǵandary keler jyly qaıta otyrǵyzylady. Al ekologtar bolsa topyraqqa kómilmeı, shashylyp jatqan qyzǵaldaq tuqymdarynyń ónýi ekitalaı ekenin, Kóktóbe bókterin qazǵanda topyraq bosańsyp, kóshýi múmkin bolǵandyqtan, onda aǵash otyrǵyzýǵa bolmaıtynyn aıtady.
Árıne qala basshylyǵynyń nıeti túzý, Almatynyń jasyl qalaǵa aınalǵanyn qalaıdy. Kinárat ózimizde bolyp tur. Adamdardy qoǵamnyń ıgiligi jolyndaǵy ortaq maqsattarǵa jumyldyratyn senbilikter sóz joq kerek. Biraq keıbir kezde onyń basym kópshiligi kóz aldaý úshin uıymdastyrylatynyn kórip júrmiz.