Jaqynda «Qazposhta» aksıonerlik qoǵamynyń Nur-Sultan qalalyq fılıalynda kezekti merzimdi baspasózge jazylý naýqanyna arnalǵan aksııa ótti. Jyl saıyn «Qazposhta» AQ merzimdi basylymdardyń ókilderi men qalalyq oqyrmandardyń arasynda baspasózge jazylý kúnin ótkizedi. Bul kúni oqyrmandar ózderiniń súıikti gazet-jýrnaldaryna jazylyp, redaksııa ókilderine saýaldaryn qoıyp, shara barysynda jyly lebizderin arnap, máre-sáre bolyp qalady.
Ústimizdegi jyldyń 9 aıynyń qorytyndysy boıynsha «Qazposhta» arqyly Qazaqstanda gazet-jýrnaldarǵa jazylýdyń jalpy kólemi 108 363 590 danany quraǵan.
Aıta ketetin taǵy bir jaıt, Respýblıkalyq gazetterdiń úzdik bestigine «Egemen Qazaqstan», «Jas Alash», «Ana tili», «Kazahstanskaıa pravda» jáne «Uıǵyr avazı» basylymdary kirgen. Aımaqtyq kóshbasshylar arasynda – «Jetisý», «Aqtóbe», «Ognı Alataý», «Aq Jol», «Iýjnyı Kazahstan» gazetteri bar. El boıynsha barlyǵy 204 respýblıkalyq jáne 521 aımaqtyq gazet jazylym boıynsha taratylady. Jazylýdyń jalpy kólemindegi respýblıkalyq basylymdardyń úlesi 45%-dy, óńirlik basylymdardyń úlesi 54%-dy quraǵan. Tırajdyń 1%-y halyqaralyq merzimdi basylymdarǵa tıesili. Qazaqstandyqtar Qazaqstan, Reseı, Belarýs jáne Ýkraınanyń 3 myńnan astam gazet-jýrnaldaryna Qazposhta arqyly jazylý múmkindigine ıe.
«Statıstıka jazylý tırajynyń tómendegenin kórsetti. О́tken jyl qorytyndysy boıynsha jazylýdyń jalpy kólemi 127,8 mln danany qurady. Bıyl qarasha men jeltoqsan aılaryna jazylý áli jalǵasýda jáne jyl sońynda kórsetkishter shamaly ósedi. Biraq tutastaı alǵanda ótken jyldyń kórsetkishinen aspaıdy. Biz elektrondy basylymdarǵa kóshý – qazaqstandyq statıstıkany rastaıtyn jalpy álemdik trend ekenin túsinemiz», dedi «Qazposhta» AQ «Nur-Sultan» fılıaly dırektorynyń orynbasary Jandos Jańabergenuly.
«Qazposhta» AQ mamandarynyń málimetinshe, gazet-jýrnalǵa jazylý aýyldarda kóp tirkelgen. Barlyq taralymnyń 73%-y solarǵa tıesili. Aýyl turǵyndary oblystyq, qalalyq jáne aýdandyq basylymdarǵa jazylǵandy (jalpy tırajdyń 58%-y) jón kóredi. Jazylý boıynsha Qazaqstannyń óńirleri arasynda Almaty, Qyzylorda, Qaraǵandy jáne Jambyl oblystary kósh bastap tur. Qazirdiń ózinde 2020 jylǵa jazylý bastalyp ketti. Baspasózge jazylýdy kez kelgen Qazposhta bólimshesinde resimdeýge bolady.