Qaraǵandy oblysynda «Eńbek» baǵdarlamasy aıasynda 36 myń adam jumysqa ornalasty. Bul jumyspen qamtý ortalyqtaryna júgingenderdiń jalpy sanynyń 94% quraıdy.
Oblysta atalǵan baǵdarlamanyń oryndalýy kásibı jáne qysqa merzimdi bilim berý, jańa bıznes-ıdeıalardy iske asyrý jáne eńbek resýrstarynyń utqyrlyǵy syndy úsh baǵyt boıynsha júzege asyryldy.
Bul týraly aqparat jınalysynda Qaraǵandy oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Ásem Júnisbekova málim etti.
–Eńbek naryǵynyń qajettiligin eskere otyryp, tehnıkalyq jáne kásiptik bilimi bar kadrlardy daıarlaýǵa jyl basynan 700 adam jiberildi. Qysqa merzimdi kýrstarda shamamen 3 500 adam oqýdan ótti. Kásibı kýrstarda 1900 adam oqytyldy. Jańa bıznes-ıdeıalardy iske asyrýǵa bıylǵy jyly 1663 grant berý josparlanǵan, al qazirdiń ózinde onyń 1037-i berildi, – dep atap ótti ol.
Jalpy, «Eńbek» baǵdarlamasy oblystyń aýyldyq aýdandarynda da júzege sátti asyp jatyr. Mysaly, aýyl sharýashylyǵy basqarmasynyń basshysy Saǵynjan Apaqashov aıtqandaı, bıyl shaǵyn nesıeleýge 6 mlrd 58 mln 251 myń teńge bólingen. Onyń basym bóligi Buqar jyraý, Qarqaraly jáne Jańaarqa aýdandarynyń turǵyndaryna berilipti.
Apparat jınalysynda oblys ákimi Jeńis Qasymbek «Eńbek» baǵdarlamasyn júzege asyrý boıynsha jumysty jalǵastyrý kerektigin jáne kýrs túlekteri men jastar tájirıbesinen ótkenderdi jumysqa ornalastyrý máselesin nazarda myqtap ustaýdy tapsyrdy.