Taraz qalasyndaǵy «Jastar alleıasynyń» «Bilim» alańynda Qazaqstan Jýrnalıster odaǵynyń múshesi, Jambyl oblystyq «Araı» jastar gazetiniń fototilshisi Altynbek Qartabaıdyń «Móp-móldir kózdiń qarasyn, Tarazdan ǵana tabasyń» atty fotopoezııa kórmesi ótti.
Taraz qalalyq ákimdiginiń uıymdastyrýymen ótken shara Jambyl oblysynyń 80 jyldyǵyna arnaldy. Áıgili Fırdoýsı ǵazalymen atalǵan keshti jas aqyn Nurjan Qadiráli júrgizdi. Kórme áýeli ashyq aspan astyndaǵy klassıkalyq valspen ashyldy. Sodan keıin júrgizýshi ortaǵa shyǵyp, kartınalardyń betperdelerin asha júrip óleń oqydy. Osy sátte óńirdegi «Aqkerbez» bıshiler tobynyń ulttyq naqyshta kıingen arýlary da barlyq kartınalardyń betperdelerin ashyp, olardy kópshilik nazaryna usyndy.
Áýlıeata óńirinen qazaq ádebıetinde esimi belgili tulǵalar kóptep shyqqan. Kóne zamanda da Shyǵys shaıyrlarynyń Tarazdy tamsana jyrlaǵany tarıhtan belgili. Bul oraıda Altynbek Qartabaı óziniń tuńǵysh shyǵarmashylyq kórmesin aqyndardyń óleńderimen keremet úılestire bilýimen de erekshelendi deýge bolady. Fototilshi qazaqtyń arý qyzdary, sonymen qatar altyn kúz, aqyndar beınesi, tabıǵat kórinisteri sııaqty kórkem kórinisterdi de qalt jibermegen. Al, bul shyǵarmalar Jaqsylyq Sátibekov, Arǵynbaı Bekbosyn, Tynyshbaı Raqym, Kúlásh Ahmetova, Serik Tomanov, Maraltaı Raıymbekuly sııaqty aqyndardyń óleńderimen jaqsy jarasym taýyp, kórmeni tamashalaýshylarǵa keremet kúı syılady. Fotopoezııa kórmesin tamashalaýǵa kelgen Jambyl oblysy ákiminiń orynbasary Sulýshash Qurmanbekova mundaı keshtiń Taraz topyraǵynda tuńǵysh ret uıymdastyrylyp otyrǵanyn atap ótip, kórme ıesiniń jumysyna sáttilik tiledi.
Bul kúni Altynbek Qartabaı Jambyl oblysynyń 80 jyldyǵyna oraı kópshilik nazaryna 80 sýret usyndy. Onyń ishinde óńir tarıhynan syr shertetin týyndylar da bar. «Týǵan jerdiń, qorshaǵan ortanyń keremet sulýlyǵyn kórmeý múmkin emes. Men bul kórmede ózimniń fototýyndylarymmen qos ónerdi biriktirip, aqyndar shyǵarmashylyǵyn da osy keshke arqaý etýdi maqsat ettim», deıdi Altynbek Qartabaı. Bul kúni tarazdyqtar túrli taqyryptaǵy kartınalardy tamashalap, óz áserlerimen bólisti.