Jer álemdi jańartyp, jasartyp kelgen ulystyń uly kúni – áz-Naýryz meıramynyń qarsańynda Prezıdenttik mádenıet ortalyǵynda “Túrki álemi” ortalyǵy ashyldy.
Elbasy N.Nazarbaev ótken jyldyń qazan aıynda Ázirbaıjannyń Nahıchevan qalasynda ótken túrki memleketteri arasyndaǵy yntymaqtastyqty arttyrý jóninde usynys aıtqany belgili. Sol usynys túrki memleketteri basshylarynan qoldaý taýyp, qazirgi tańda Túrki memleketteri basshylary keńesi men Túrki dúnıesi aqsaqaldar keńesi quryldy. Túrki dúnıesi akademııasynyń Astanada ornyǵatyny jáne málim. Ejelden baýyrlas halyqtar arasyndaǵy osyndaı istiń elordadaǵy uıytqysyndaı “Túrki álemi” ortalyǵynyń ashylýy bul baýyrlardyń mádenı, ǵylymı, rýhanı jaǵynan jaqyndaýyna jol ashary anyq.
Ortalyqtyń ashylý rásiminde sóz alǵan Prezıdenttik mádenıet ortalyǵynyń dırektory Myrzataı Joldasbekov mundaı qadam memleketter arasyndaǵy dostyqty tereńdetip qana qoımaı, birlikte jumys isteýge jol ashatynyn, ıgilikti shara Túrkııa premer-mınıstri janyndaǵy Túrki halyqaralyq yntymaqtastyq jáne damý agenttigimen (TIKA) birlesý nátıjesinde oryndalyp otyrǵanyn tilge tıek ete kelip, Túrkııa men qazaq eli arasyndaǵy tarıhı baılanysqa jan-jaqty toqtaldy.
Zaman talabyna saı jaraqtalǵan oqý zalyna ǵalamtorǵa qosylǵan 20 kompıýter qoıylypty. Eki eldiń arǵy-bergi tarıhynan mol derek beretin kitaptar, kórkem dúnıeler, memleket basshylarynyń eńbekteri qoıylǵan. Bolashaqta Túrkııadan qazaq eliniń ómirine qatysty myńdaǵan kitaptar jetkizilip, kitaphanalar ǵalamtor arqyly jalǵasyp, maǵlumat almasý júıeli túrde jolǵa qoıylmaq. Munyń ǵalymdar men izdenýshilerge paıdaly bolatyny aıtpasa da túsinikti.
Ortalyqtyń ashylý rásiminde Túrkııanyń Qazaqstandaǵy Tótenshe jáne ókiletti elshisi Atılla Gúnaı, senator Qýanysh Sultanov, TIKA-nyń Qazaqstandaǵy ókili Omer Qojamen “Túrki álemi” ortalyǵynyń qazaq topyraǵynda qutty meken bolatynyna senim bildirdi.
Jaqsy bastama odan keıin “Armysyń, áz-Naýryz!” atty túrki dúnıesiniń kórmesine ulasty.
Súleımen MÁMET.