Jýyrda Soltústik Qazaqstan oblysynyń onomastıkalyq komıssııasy óńirdegi birneshe eldimekender men kóshelerdi qazaqsha ataý týraly halyqtyń usynystary men jergilikti ákimdiktiń qoldaýhatyn quptady.
Sonyń ishinde Tımırıazev aýdanyna Sábıt Muqanovtyń esimin berý týraly usynysqa oń qorytyndy berilip, kópten aıtylyp kele jatqan bul sheshim joǵaryǵa joldanyp otyr. Bul halyqtyń kópten kútken qýanyshty jańalyǵy edi. Qazaq ádebıeti klassıkteriniń biri bola tura Sábıt Muqanovqa ózi týǵan aýdannyń atyn berý túrli sebeptermen uzaqqa sozylyp ketken. Endi sony R.Álishev tóraǵalyq etetin oblystyq onomastıkalyq komıssııa qoldap otyr. Marqumnyń týǵan jeri osy aýdannyń aýmaǵyndaǵy Jamanshubar degen qystaý ekenin ádebıet súıer qaýym jaqsy biledi.
Sábeń óz zamanynyń ozyq oıly, daryndy ádebıetshileriniń biri boldy. Qazaqtyń birneshe býyn urpaǵy onyń shyǵarmalarynan rýhanı nár alyp ósti. Onyń qalamynan ondaǵan prozalyq shyǵarmalar, poemalar, dramalar, pýblısıstıkalyq dúnıeler týdy. Jerlesteriniń myna syılyǵy aldymyzdaǵy jyly sáýir aıynda keletin 120 jyldyq mereıtoıyna úlken syı bolǵaly tur.
Sondaı-aq onomastıkalyq komıssııa Petropavl qalasyndaǵy Qazaq mektep-gımnazııasyna uly Abaıdyń esimin berý týraly sheshimdi de qoldady. Bul - jańa jobamen salynǵan myń oryndyq eń úlken qazaq mektebi. Oǵan 175 jyldyǵy qarsańynda uly Abaıdyń esimi berilgeni óte oryndy sheshim boldy.
Jańadan ashylyp, «№25 orta mektep» degen ataý alǵan taǵy bir qazaq mektebine ataqty jerlesimiz, belgili memleket jáne qoǵam qaıratkeri Mahtaı Saǵdıevtiń esimin berý týraly usynysty da onomastıkalyq komıssııa qoldady. Mákeńniń atyna Esil aýdanynyń ortalyǵy Iаvlenka selosynan da bir kóshe atyn berý usynylǵan eken. Bul usynys ta qoldaý tapty.
Budan basqa birneshe aýdannyń ortalyqtary men aýyldaryndaǵy kósheler men mektepterge ataqty jerlesterimizdiń esimderin berý týraly sheshimder maquldandy. Sonyń ishinde jazýshy Zeınel-Ǵabı Imanbaevtyń esimi ózi turǵan Shal aqyn aýdanyndaǵy «Prıshımka» orta mektebine berildi. Al Vagýlıno aýylyndaǵy bir kóshe 100 jyldyq mereıtoıyn toılaǵaly jatqan elimizdiń bas gazeti «Egemen Qazaqstannyń» atyna berildi.
Qazaqy ataýlardyń arasynda Sh.Ýálıhanov, M.Jumabaev, Abylaı han, Alash, Dostyq jáne t.b. bar. Al Novonıkolskoe aýylyndaǵy bir kóshe Eńbek Eri, marqum Gennadıı Zenchenkonyń atymen atalatyn boldy.
Soltústik Qazaqstan oblysy