Qasym-Jomart Toqaev Almatydaǵy rezıdensııasynda Ulttyq qoǵamdyq senim keńesiniń múshelerimen birqatar kezdesýler ótkizdi. Bul týraly Aqordanyń baspasóz qyzmeti habarlady.
«Adam quqyqtary hartııasy» qoǵamdyq qorynyń atqarýshy dırektory Jemis Turmaǵambetovamen kezdesý barysynda azamattyq qoǵamnyń perspektıvalary jáne quqyq qorǵaý uıymdarynyń memlekettik organdarmen ózara yqpaldastyq máseleleri talqylandy.
Áleýmettanýshy, «Strategııa» áleýmettik jáne saıası zertteýler ortalyǵy» qoǵamdyq qorynyń basshysy Gúlmıra Ileýova «Halyqtyń únine qulaq asatyn memleket» tujyrymdamasyn damytý jónindegi oı-pikirimen bólisti. Atap aıtqanda, ol atalǵan tujyrymdamany júzege asyrýda áleýmettik zertteýlerdiń atqaratyn róli týraly aıtty.
Sonymen qatar kezdesýde Qoǵamdyq keńester ınstıtýtynyń jumysy, joǵary oqý oryndaryna avtonomııa berý, medısınalyq saqtandyrý júıesin engizý jónindegi usynystar qarastyryldy.
Almaty joǵary basqarý mektebiniń jáne «Aspandaý» ǵylymı-bilim berý qorynyń prezıdenti Qanat Nurov áleýmettik-ekonomıkalyq saıasat júrgizý, jekemenshik ınstıtýttar men qor naryǵyn damytý máselelerin qozǵady.