Búgingi tańda Jambyl óńiriniń týrızm salasyndaǵy jetistikteri jeterlik. Tarıhı aımaqty týrızm ortalyǵyna aınaldyrý basty nazarda. Ásirese Áýlıeata jerine saıahattap kelgen sheteldik týrısterdiń óńir tarıhyna degen qurmeti joǵary.
Alaıda, zaman talabyna saı kez kelgen kelýshiniń óz betinshe óńir týrızmi týraly aqparat alǵany durys. Bul rette Jambyl oblystyq týrızm basqarmasynyń tapsyrysymen elimizde tuńǵysh ret Elbasynyń «Rýhanı jańǵyrý» baǵdarlamasy men «Jastar jyly» aıasynda «Taraz – Almaty» jáne «Taraz – Shymkent» avtojoldarynyń kireberis doǵalaryna 88,8 FM radıotolqyny ornalastyryldy.
Endi ejelgi Taraz shaharynyń batys jáne shyǵys qaqpalaryna ornatylǵan radıotolqynnan kóne qalaǵa kelýshi qonaqtar da, týrıster de kólikte kele jatyp-aq óńir týrızmi týraly barlyq aqparatty tyńdaı alady. «Atalǵan radıotolqynda qazaq, orys jáne aǵylshyn tilderinde týrıstik aqparattyq aýdıorolıkter translıasııasy iske qosylǵan. Sonymen qatar munda óńirdiń týrıstik áleýetin arttyrý maqsatynda «Sıfrly Qazaqstan» baǵdarlamasyn júzege asyratyn «Taraz Tour» mobıldik qosymshasy týraly aqparat ta turaqty túrde berilip turady», deıdi basqarma basshysy Qarlyǵash Aralbekova.
Atalǵan qosymshada óńirge kelýshi týrıster men qonaqtarǵa oblystaǵy negizgi 33 tarıhı-mádenı oryn men qonaqúıler, tamaqtaný keshenderi men shıpajaılar týraly qazaq, orys, aǵylshyn, túrik jáne qytaı tilderinde aqparat beriledi. О́ńirge kelýshi barlyq týrıst bul rette óz tańdaýyn jasaıdy. Al sheteldik týrıster sol qosymshadaǵy sóıleý sózdigimen jáne ekskýrsııalyq marshrýttardy quryp beretin ınteraktıvti kartany qoldanyp, ár nysanda ornatylǵan arnaıy QR-kodtardy da ózderiniń uıaly telefondaryna skanerleı alady. Sol arqyly kez kelgen týrıst arnaıy ornatylǵan aýdıogıdten tolyqqandy aqparat alýyna bolady. Bir sózben aıtqanda, tili de, turmysy da bólek sheteldik týrıster úshin Tarazdaǵy bul bastama barlyq qajettilik úshin qoljetimdi bolyp tur.
Jambyl oblysy