2016 jyldan bastap jumys isteıtin Nur-Sultan qalasynyń ákimdigine qarasty «áleýmettik qyzmet kórsetý ortalyǵy» memlekettik kommýnaldyq qazynalyq kásiporyny psıhonevrologııalyq patologııasy bar, tirek-qımyl apparaty buzylǵan balalarǵa jáne jalǵyz basty qart adamdarǵa arnaýly áleýmettik qyzmet kórsetedi. Arnaıy áleýmettik qyzmetti úıde de, jartylaı stasıonar jaǵdaıynda da alýǵa bolady. Bul týraly Nur-Sultan qalasy ákimdiginiń baspasóz qyzmeti habarlady.
Qazirgi tańda ortalyqta 3 bólimshe bar: serebraldy sal aýrýy dıagnozy bar balalar bólimshesi, daýn dıagnozy men aýtızm dıagnozy bólimsheleri.
Ortalyq úshburysh-pıramıda júıesi boıynsha jumys isteıdi: maman - áleýmettik qyzmetker-ana. Bala ońaltýǵa kelgende, ortalyqtyń mamandary balaǵa jeke dıagnostıka júrgizip, medısınalyq mýltıkomandalyq baǵa beredi. Sonan soń balany emdeýdiń jeke josparyn jasaıdy. Ortalyqta psıhologtar, defektologtar, logopedter, reabılıtologtar, ortopedtar, nevropatologtar, sondaı-aq eńbek terapııasy men mýzykoterapııa mamandary jumys isteıdi.
«Búgingi tańda bizde 1040 qyzmet alýshy bar. Olardyń 560 – y múmkindigi shekteýli balalar, 480-y jalǵyz basty qart adamdar. Ońaltý uzaqtyǵy 3 aıdy quraıdy jáne jylyna 4 ret ótedi. Bizdiń negizgi qyzmetimiz arnaıy áleýmettik kómekti úıde kórsetý. Bizdiń áleýmettik qyzmetker qyzmet alýshyǵa aptasyna 2 ret barady. Ortalyqtyń balalarmen belsendi jumystanýy nátıjesinde 30 - ǵa jýyq bala alǵashqy qadamdaryn jasap, alǵashqy sózderin aıtty», - dedi dırektordyń mindetin atqarýshy Amanbaı Erdáýlet. Ortalyq kún saıyn balalardy ońaltý boıynsha is-sharalar ótkizedi.
«Bul ortalyqqa 4 jyl boıy kelýdemiz. Meniń nemerem bul jerde basqa balalarmen aralasady, oınaıdy. Osy 4 jyl ishinde kóp nárseni úırenip úlgerdi. Ortalyqqa kelýge árdaıym asyq, úlken qýanyshpen keledi. Ortalyq qyzmetkerlerine úlken alǵysymdy bildiremin», dedi Mıhaıl esimdi balanyń ájesi Svetlana Romanenko.
Ortalyq mamandary 8 arnaıy áleýmettik qyzmet kórsetedi:
- áleýmettik-turmystyq;
- áleýmettik-medısınalyq;
-áleýmettik-pedagogıkalyq;
-áleýmettik-psıhologııalyq;
-áleýmettik-eńbek;
-áleýmettik-mádenı;
-áleýmettik-quqyqtyq;
-áleýmettik-ekonomıkalyq qyzmetteri.